قازاقستان مەن وزبەكستان ەكونوميكالىق ستاتيستيكا الماسۋدى جىلدامداتادى

تاشكەنت. قازاقپارات - قازاقستان رەسپۋبليكاسىنىڭ وزبەكستانداعى ەلشىسى ەرىك وتەمبايەۆ وزبەكستان رەسپۋبليكاسى مەملەكەتتىك ستاتيستيكا كوميتەتىنىڭ ءتوراعاسى باحودير بەگالوۆپەن كەزدەستى، دەپ حابار بەرەدى «قازاقپارات» ح ا ا- نىڭ مەنشىكتى ءتىلشىسى.

سۇحباتتا تاراپتار قازاقستان مەن وزبەكستاننىڭ ستاتيستيكا ورگاندارى اراسىنداعى بايلانىستاردى كەڭەيتۋ مۇمكىندىكتەرى، قازاقستان مەن وزبەكستان پرەزيدەنتتەرىنىڭ 2020 -جىلعا قاراي ءوزارا ساۋدا اينالىمىن 5 ميلليارد دوللارعا دەيىن ارتتىرۋ تۋرالى تاپسىرمالارىن ورىنداۋ جۇمىستارىن جانداندىرۋ، سونداي-اق ءوزارا ساۋدا ستاتيستيكاسىن بىركەلكى تۇسىنۋگە كەدەرگى جاسايتىن توسقاۋىلداردى جويۋ ماسەلەلەرىن تالقىلادى.

قازاقستان ەلشىسى ەرىك وتەمبايەۆ وزبەك تاراپىن شەكارالىق ساۋدا بايلانىستارىن جانداندىرۋ جۇمىستارى تۋرالى ەگجەي- تەگجەيلى حاباردار ەتىپ، بىرىككەن ءوندىرىس ورىندارىن قۇرۋ جوبالارى جايىندا اڭگىمەلەدى. ال مەمستاتكوم ءتوراعاسى باحودير بەگالوۆ جۇرگىزىلىپ جاتقان جۇمىستاردىڭ ماڭىزىن تىلگە تيەك ەتىپ، قازاقستان مەن وزبەكستان اراسىندا ستاتيستيكالىق جىلدام اقپارات الماسۋعا جاعداي جاساۋ باعىتىنداعى نەگىزگى جوبالار تۋرالى اقپارات بەردى.

كەزدەسۋ قورىتىندىلارىنا وراي، تاراپتار قازاقستان رەسپۋبليكاسى ۇلتتىق ەكونوميكا مينيسترلىگىنىڭ ستاتيستيكا كوميتەتى مەن وزبەكستان رەسپۋبليكاسىنىڭ مەملەكەتتىك ستاتيستيكا كوميتەتىنىڭ اراسىندا ءوزارا تۇسىنىستىك تۋرالى مەموراندۋمعا قول قويۋعا دايىندىق جۇمىستارىن جىلدامداتۋعا كەلىستى.