نەمەرە ءسۇيىپ وتىرعان باقىت شادايەۆا ءالى دە تۇرمىسقا شىعۋدان ءۇمىتتى ەكەنىن ايتتى
بىرنەشە جىل بويى كورەرمەن كوزىنەن تاسادا قالعان ءانشى، شىعارماشىلىققا بەلسەنە كىرىسىپ كەتكەن. ءتىپتى، تىڭدارماندارىنا تىڭ تۋىندىلاردى ازىرلەپ، بۇگىندە بەينەبايان تاسپالاپ جاتىر.
«مەن باقىتتى كۇندەرىمدى قالاي ۇمىتامىن؟» دەپ اتالاتىن كليپتەگى كەيىپكەرلەردىڭ تىزىمىندە ءانشىنىڭ قۇربىلارىمەن قاتار كۋميرلەرى دە بار. ولار قازاقستاننىڭ قوس حالىق ءارتىسى روزا رىمبايەۆا مەن ناعيما ەسقاليەۆا جانە اكتريسا گۇلنار دۋسماتوۆا. ونەر ولكەسىنىڭ وكىلدەرى بۇل بەينەباياندا نوستالگياعا تولى ساتتەرىن ەسكە الادى. ال، شىعارماشىلىعى ۇنسىزدىككە تاپ بولعان شادايەۆا، ساحنادان الشاقتاپ قالۋىنىڭ سەبەبىن ءتۇسىندىردى.
«ونەردەن جوق بولىپ كەتكەن سەبەبىم، ۇلكەن قىزىم بويجەتىپ، وقۋىن ءبىتىرىپ، ونى ورنالاستىراتىن ءسات كەلدى. مەن وعان ءبىراز كوڭىل ءبولدىم. كەزىندە ونەر دەپ ءجۇرىپ كوپ قارامادىم. قازىر تۇرمىسقا بەردىم. ەكى نەمەرەم بار. ونەردى قيسام، سول وسى جانۇيانىڭ ماسەلەسىنە بايلانىستى» - دەيدى قىزىن قياعا قوندىرعان باقىت حانىم.
الايدا، تۇڭعىشى اق كەلىن اتانعانىمەن، شادايەۆا وتاندىق شوۋ-بيزنەستەگى باسى بوس حانىمداردىڭ قاتارىندا ەكەنىن جاسىرمادى. كەلەر كۇننەن كۇدەرىن ۇزبەگەن ءانشى باقىت، الداعى ۋاقىتتا ومىرلىك جارىن جولىقتىرىپ، ءبىر باسىنىنىڭ ەكەۋ بولعانىن قالايدى.
«جار تابۋدى ءومىردىڭ ءوزى كورسەتەدى. جەكە باسىما بايلانىستى ايتاتىن بولسام، قۇداي جاردى بەرىپ جاتسا، كەزدەستىرىپ جاتسا ونى ۋاقىتى كەلگەندە ايتامىن» - دەپ ۋادە بەردى شادايەۆا.
سونىمەن قاتار، ءان الەمىنە ورالعان باقىت حانىم، وتاندىق كينووندىرىستىڭ وركەندەۋىنە دە وزىندىك ۇلەسىن قوسۋعا نيەتتى. ناقتىراق ايتساق، شادايەۆا قازاقستاندىق اكتريسالاردىڭ قاتارىن تولىقتىرماق. ءانشى جاقىن كۇندەرى ءتۇسىرىلىم جۇمىستارى باستالاتىن «لەدي مەگوپوليسا» اتتى كارتيناداعى باستى رولدەردىڭ بىرىنە بەكىتىپتى!
«باقىت شادايەۆانى اكتريسا دەپ ايتا بەرۋگە بولادى. اكتەرلىق شەبەرلىگى ساباعىنان وتكەنبىز. قازىر شىنىندا دا كينوعا تۇسكەلى جاتىرمىن. التى سەريالى كارتينا. وعان دا مەن سونداي قۋانىپ جاتىرمىن. ويتكەنى، كەرەمەت سيۋجەت، كەرەمەت فيلم. ءبىز قاتارلى ايەلدەرگە ارنالعان فيلم» - دەيدى اكتريسالىق مانسابىنداعى جاعىمدى جاڭالىعىمەن بولىسكەن باقىت شادايەۆا.
