قازاقستاندا حالال- يپوتەكا پايدا بولۋى مۇمكىن

 استانا. قازاقپارات - «استانا» حالىقارالىق قارجى ورتالىعى اكىمشىلىگى» اق باسقارما مۇشەسى، باسقارۋشى ديرەكتورى ساياسات نۇربەك حالال- يپوتەكانىڭ پايدا بولۋىنا قاتىستى پىكىر ءبىلدىردى.

بۇل تۋرالى Zakon.kz جازادى.

ونىڭ ايتۋىنشا، حالال- يپوتەكا ەلىمىزدە بىرنەشە جىلدان سوڭ پايدا بولۋى مۇمكىن. بۇل جەرگىلىكتى قارجى ينستيتۋتتارىنا تىكەلەي بايلانىستى. ەۆرازيا نارىعىندا قازىرگى تاڭدا 100 ميلليونداي ادام تۇراتىندىقتان (20 ميلليون - رەسەي، 70-80 ميلليون - ورتا ازيا اۋماعىندا) بۇل يسلامدىق قارجىلاندىرۋ ءۇشىن اسا ءتيىمدى بولماق.

«قازىر يسلامعا قاتىسى جوق لوندون، ليۋكسەمبۋرگ، فرانكفۋرت سەكىلدى قالالاردىڭ ءوزى يسلام قارجى جۇيەسىن تارتا باستادى»، - دەيدى نۇربەك. ايتۋىنشا، قازىرگى كەزدە حالىق ادەتتەگى قارجىلىق قىزمەتتەردەن باس تارتىپ، ونىڭ بالاما كوزدەرىن ىزدەي باستاعان. وسىنداي كەزدە يسلام قارجى جۇيەسىنىڭ ءوز قىزمەتىن ۇسىنۋى تاپتىرماس مۇمكىندىك.