استاناداعى «الەم بارىسىندا» قازاقستاننىڭ نامىسىن قاي بالۋاندار قورعايدى
ءدۇبىرلى دوداعا قازاق كۇرەسىنە بەيىمدەلگەن، بەيىمدەلىپ قانا قويماي، توپ جارىپ تا جۇرگەن جاھاننىڭ 40 ەلىنەن كىل مىقتىلار كەلە جاتىر. ال وسىناۋ جاۋاپتى دودادا قازاقستاننىڭ نامىسىن قاي بالۋاندار قورعايدى؟ «قازاقپارات» ح ا ا ءتىلشىسى وسى باسەكەدە كوك بايراقتى ەلدىڭ ابىرويى ءۇشىن بوز كىلەمگە شىعاتىن بالۋاندارعا شولۋ جاسايدى.
ايبەك نۇعىماروۆ.
ءسوزسىز، سوڭعى جىلدارى قازاق كۇرەسىندەگى «جۇلدىزدى» بالۋانداردىڭ قاتارىنداعى ايبەككە بۇل جولى دا زور جاۋاپكەرشىلىك ارتىلعالى وتىر. اسىرەسە، 2014 -جىلى پاۆلودار قالاسىندا وتكەن تۇڭعىش «الەم بارىسىندا» ايبەك كۋبالىق ۆيدال برايسونعا ەسە جىبەرىپ العان بولاتىن. بۇل جولى ەسە قايتارۋعا مۇمكىندىك بار. بۇعان قوسا ايبەك 2013 -جىلى «قازاقستان بارىسى» ءتۋرنيرىن جەڭىپ العان. 2016 -جىلى وڭتۇستىك قازاقستانداعى حالىقارالىق تۋرنيردە «تۇيە بالۋان» اتانعان بولاتىن.
ەلامان ەرعاليەۆ.
بيىل عانا «قازاقستان بارىسى» اتانعان ەلامان ەرعاليەۆتىڭ قازاق كۇرەسىندە 10 جىل تاجىريبەسى بار. ەل چەمپيوناتىندا بالۋان فينالدىق جەكپە-جەكتە ۇلان رىسقۇلوۆتى جامباسقا لاقتىرىپ، جەڭىس تۇعىرىنا كوتەرىلگەن بولاتىن. رەسپۋبليكالىق تۋرنيردەن بۇرىن ەلامان «اسكەر بارىسى» اتانعان. قازاق كۇرەسىمەن بىرگە دزيۋدونى دا مەڭگەرگەن. بيىلعى ەل چەمپيوناتىندا بالۋان «قازاقستان بارىسى» اتانعان ۇلان رىسقۇلوۆپەن بىرگە، مۇحيت تۇرسىنوۆتى دا تىزە بۇكتىرگەن ەدى. نەبارى 22 جاستاعى ەلامان «الەم بارىسىندا» ۇلتتىق قۇرامانىڭ ساپىندا كۇرەسەدى.
ەرجان شىنكەيەۆ.
كۇرەس، سامبو، دزيۋدو جانە قازاق كۇرەسى... شىن مىقتىعا وڭ مەن سولى بىردەي بولاتىنىنداي، ەرجان دا وسىناۋ جەكپە-جەكتىڭ بىرنەشە ءتۇرىن ەركىن مەڭگەرگەن. ءتىپتى دزيۋدودان 2012 -جىلى لوندونداعى وليمپيادادا ەل نامىسىن قورعاپ كەلگەن. «قازاقستان بارىسى» سايىسىنا بىرنەشە مارتە قاتىسىپ، بارىن سالعانىمەن، چەمپيون بولۋ ەرجانعا بۇيىرماي كەلەدى. دەسە دە، ەرجان «قازاقستان بارىسى» اتاعى بار بالۋاندارمەن تەرەزەسى تەڭ ونەر كورسەتىپ، فينالعا دەيىن جەتكەن كەزى بار.
داۋرەن نۇرالينوۆ.
اتى ەندى شىعىپ كەلە جاتقان جاس بالۋان «كۇش اتاسىن تانىماس» دەيدى. بيىلعى جىلى «الماتى بارىسى - 2017» سايىسىندا ول ۇزدىك تورتتىككە ەنىپ، ءتىپتى فينالدا تانىمال رۋسلان ابدىرازاقپەن كۇرەسكەن بولاتىن. بەلدەسۋدىڭ العاشقى كەزەڭىندە قارسىلاسىنا ايتارلىقتاي تەگەۋرىن تانىتقانىمەن، فينالدىق كەزدەسۋ ءبارىبىر تاجىريبەسى مول رۋسلاننىڭ پايداسىنا شەشىلگەن ەدى. «اياكوز ارلانى» دەگەن لاقاپ اتى بار بالۋان بيىل ۇزەڭگىلەس اعالارىمەن «الەم بارىسىندا» ونەر كورسەتەدى.
ايبات سەيتەن
قازاق كۇرەسىنەن حالىقارالىق دارەجەدەگى سپورت شەبەرى ايبات سەيتەننىڭ جاسى 25-تە. سالماعى 100 كەلىدەن جوعارى بالۋان 2014 -جىلى جاستار اراسىنداعى ەل چەمپيوناتىندا جەڭىمپاز اتانعان. 2014 -جىلى ازيا چەمپيونى بولعان. ارقانىڭ بالۋانى 2016 -جىلى ەلوردادا وتكەن «استانا قىرانى-2016» تۋرنيرىندە توپ جارعان.
