فۋتزالدان «قايرات» يسپانيالىق «ينتەردى» جەڭدى
ەكى كلۋبتىڭ كەزدەسۋى قارسىلاستىڭ الاڭىندا مادريد پروۆينتسياسىنا جاتاتىن توررەحون-دە-اردوس مۋنيتسيپاليتەتىندە ءوتتى.
كەزدەسۋ «ينتەر» كلۋبىنىڭ ۇيىمداستىرۋىمەن وسىمەن 3-جىل قاتارىنان وتكىزىلىپ وتىرعان «توررەحون جانە مانۋەل ساورين مەموريالى كۋبوگى اياسىندا ءوتتى.
بيىلعى سايىس «ينتەر» شاعىن فۋتبولىنىڭ 40 -جىلدىعىنا ارنالعان. ەكى كلۋبتا سايىس الاڭىنا ەڭ مىقتى ويىنشىلارىن شىعاردى. قارسىلاس كوماندا الاڭ يەسى رەتىندە العاشقى تايمدا الماتىلىقتاردى تىقسىرىپ، ەليساندرونىڭ ەپتىلىگىمەن العاشقى بولىپ ەسەپ اشتى.
الايدا، ەكىنشى تايمدا الماتىلىقتار يسپاندىقتاردىڭ ادىمىن اشتىرمادى. ەكىنشى تايمنىڭ ءۇشىنشى مينۋتىنان كەيىن «قايراتتىڭ» جاڭا ويىنشىسى تۋنيستىك لەگيونەر تايەبي تارازى باسىن تەڭەستىردى.
29-مينۋتتا الماتىلىق كلۋبتىڭ قاقپاشىسى يگيتا ءوز «ادەتىنە» سالىپ، ويىنعا ارالاستى. كوپ ۇزاتپاي يگيتا قارسىلاستىڭ قاقپاسىنا ەكىنشى گولدى سۇڭگىتتى. ناتيجەسىندە، قازاقستاندىق كلۋبتىڭ قاقپاشىسى الىستان سالعان گول ەڭ ۇزدىك بولىپ ەسەپتەلدى.
ويىننىڭ اياقتالۋىنا 7 مينۋت قالعاندا برازيليالىق لەگيونەر فەليپە 3-گولدى سالسا، ءتورتىنشى گولدى يسپاندىقتاردىڭ اشىق قالعان قاقپاسىنا دۋگلاس ءدال باعىتتاپ، قارسىلاستىڭ ويسىراي جەڭىلۋىنە سەبەپ بولدى.
ەسكە سالا كەتەيىك، ۋەفا كۋبوگىندە الماتىدا وتكەن كەزدەسۋدەن «قايرات» «ينتەردەن» 2:3 ەسەبىمەن جەڭىلگەن بولاتىن. الماتىلىق «قايرات» ميني فۋتبول كلۋبى -ۋ ە ف ا كۋبوگىنىڭ ەكى دۇركىن جەڭىمپازى.