الماتىدا قازاقتىڭ ءدۇلدۇل اقىنى ك. مىرزابەكوۆ تۇرعان ۇيگە ەسكەرتكىش تاقتا ورناتىلدى - فوتو
بۇل تۋرالى الەۋمەتتىك جەلىدە اقىن، جۋرناليست، جۋىردا «قازاق ادەبيەتى» گازەتىنىڭ باس رەداكتورى بولىپ تاعايىندالعان جاناربەك ءاشىمجان ءمالىم ەتتى، دەپ حابارلايدى «قازاقپارات» ءتىلشىسى.
«كەڭشىلىك عاجايىپ شىعارمالارىن وسى ۇيدە جازدى. اقىننىڭ دۇنيەدەن وتكەنىنە 28 جىل بولىپتى. وسى جىلدار ىشىندە قازاقستان جازۋشىلار وداعى الدەنەشە رەت تاقتا ورناتۋ ماسەلەسىن الماتى قالاسىنداعى تاقتا وتىرىپ كەتكەن اقجاعالىلارعا اۋىزشا دا، جازباشا دا ەسكەرتكەن. ءارتۇرلى كەدەرگىلەر بولدى، ابىروي بولعاندا، قالا اكىمى باۋىرجان بايبەك مىرزانىڭ تىكەلەي پارمەنىمەن جۇزەگە استى. سوعىستان كەيىن تۋعان بۋىن وكىلدەرى، بەلگىلى اقىن- جازۋشىلاردىڭ ءبارى كەلدى. اقىننىڭ تۇياعى، ىزدەۋشىسى، ادەبي مۇراسىنا يە بولىپ كەلە جاتقان بەلگىلى ادەبيەت سىنشىسى امانگەلدى كەڭشىلىك ۇلىنا اللا رازى بولسىن! ءارقايسىسىمىزدىڭ پەرزەنتىمىز وسىنداي- اق بولسىن. جيىندى قالالىق ءتىل باسقارماسىنىڭ باسشىسى ماماي احەت تاماشا باسقاردى. ءبىر-ءبىرىمىزدى ءتىرى كەزىمىزدە ارداقتاپ جۇرەيىك، اعايىن... ۋاقىت بولعاندا ءار توبەدە قالامىز»، دەپ جازدى جاناربەك ءاشىمجان.
ايتا كەتەيىك، كەڭشىلىك اعىتاي ۇلى مىرزابەكوۆ قوستاناي وبلىسى جانگەلدين اۋدانى جانىبەك تارحان اۋىلىندا دۇنيەگە كەلگەن. قاز م ۋ- دىڭ جۋرناليستيكا فاكۋلتەتىن بىتىرگەن (1976). 1966-1989 -جىلدارى قوستاناي وبلىسى «كوممۋنيزم تاڭى» (قازىرگى «قوستاناي تاڭى» ) ، «لەنينشىل جاس» (قازىرگى «جاس الاش»)، الماتى وبلىسى «جەتىسۋ»، «سوتسياليستىك قازاقستان» (قازىرگى «ەگەمەن قازاقستان») گازەتتەرىندە، «جازۋشى» باسپاسىندا، «مادەنيەت جانە تۇرمىس» (قازىرگى «پاراسات») جۋرنالىندا قىزمەت اتقاردى. اقىننىڭ العاشقى جيناعى «ىڭكار دۇنيە» 1972 -جىلى باسپادان شىقتى.
ونىڭ «ءسارۋار» (1980)، «ريەۆوليۋتسيا پەرزەنتتەرى» (1980)، «قاسيەتتى قاس- قاعىم» (1985)، «ءداۋىر - داستان» (1988)، «اۋىل مەن استانا» (1994) اتتى ولەڭدەر جيناعى جارىق كورگەن. «بالالىق شاق باللادالارى» اتتى جىر جيناعى زەرتتەۋشىلەر تاراپىنان جوعارى باعالاندى (1987). ول ە. ەۆتۋشەنكونىڭ «مەنىڭ شەشەم جانە نەيترون بومباسى»، «فۋكۋ» اتتى پوەمالارىن قازاق تىلىنە اۋداردى (1989).
سونداي-اق اقىننىڭ «ىڭكار دۇنيە» (1990)، «ءبىر مىسقال» (1996)، «جولعا سالدىم كوشىمدى» (2002)، «مەنىڭ مۇڭىم - ماحاببات» (2003) اتتى جىر جيناقتارى مەن «تىڭ تۋرالى تولعاۋ» (1987) سەكىلدى ماقالالار، وچەركتەر جيناعى بار. مىرزابەكوۆ جايىندا «قايران كەڭشىلىك!» اتتى ەستەلىك كىتاپ جارىققا شىقتى (1996).
2006 -جىلى الماتى قالاسىندا كەڭشىلىك مىرزابەكوۆتىڭ قۇرمەتىنە كوشەنىڭ اتى بەرىلگەن.
