ارمان ءاشىموۆ: جەڭىلمەگەن سپورتشىنى نوكاۋتقا تۇسىرگەن كەزدە ءۇش مىڭ ادام قوڭىراۋ شالدى - كەسكىن
سپورتتىڭ بۇل سالاسىندا باس بارماقپەن باعالايتىن، الەمدىك ارەنالاردا قارسىلاستى قاھارىمەن قايمىقتىرعان تارلاندارىمىز از ەمەس.
قۋات حاميتوۆ، ارمان وسپانوۆ، ارداق نازاروۆ، بەيبىت نازاروۆ، قايرات احمەتوۆ سىندى جامپوزداردىڭ ەرلىگىن قازىر جۇرت جاتقا سوعىپ ءجۇر، دەپ جازادى baq.kz.
جاقىندا ينگۋشەتيا جەرىندە الەمگە ايگىلى M1 Global تۋرنيرى ءوتىپ، سول تۋرنيردە ارمان ءاشىموۆ ەسىمدى قازاق بالاسى كەرەمەت نوكاۋتىمەن كوپشىلىكتىڭ نازارىن اۋداردى. ونىڭ وسى ءبىر جەكپە-جەگىن Youtube بەينە-پورتالىندا قاراعاندار سانى ميلليوننان اسىپ كەتكەن. 25 جاستاعى قازاق بالاسىنىڭ ەرلىگىن وزگەلەر جارىسا جازىپ جاتقان ساتتە، بىزدە بىرەر اۋىز سۇحبات الىپ، ارمان-ماقساتتارىن تىڭداساق دەگەن ەدىك.
- ارمان، تاياۋدا جەتكەن ءىرى جەڭىسىڭىزبەن قۇتتىقتايمىن. وسى M1 Global تۋرنيرى تۋرالى اڭگىمەلەپ بەرىڭىزشى؟
- راحمەت! M1 Global تۋرنيرى - تانىمالدىلىعى جاعىنان الەمدەگى ۇزدىك بەستىككە كىرەتىن ءىرى حالىقارالىق جارىس. سوندىقتان بۇل سايىسقا قاتىسىپ، باق سىناۋ وتە ۇلكەن مارتەبە دەپ ايتار ەدىم. ماعان دا وسىنداي ءىرى الەمدىك دوداعا قاتىسۋ كەرەك بولىپ جۇرگەن. ويتكەنى، ءوزىڭىز بىلەسىز، سپورتشى ءبىر ورىندا تۇرىپ قالماۋ كەرەك، ۇنەمى فيزيكالىق دايىندىعىن شىڭداپ جۇرمەسە وسپەيدى. سودان وسىنداي ۇسىنىس ءتۇستى، ءبىز دە بىردەن ويلانباستان كەلىسىم بەردىك. دەگەنمەن، جارىسقا نەبارى ەكى اپتا قالعاندا ۇسىنىس العاندىقتان، دايىندالۋعا كوپ ۋاقىتىمىز بولمادى. ءبىراق، باپكەرىم ەكەۋمىز وسى ەكى اپتا ۋاقىتتىڭ ءوزىن ءتيىمدى پايدالانۋعا بارىمىزدى سالدىق. تاڭەرتەڭ 10-15 شاقىرىمنان جۇگىردىم، قالعان ۋاقىتتى دەنە جاتتىعۋلارىنا جانە سپاررينگ سايىستارعا ارنادىق. ارينە، فيزيكالىق تۇرعىدان جارىسقا 100 پايىز دايىن بولدىم دەي المايمىن، ويتكەنى، ءبارىبىر ەكى اپتا از ۋاقىت. دەسە دە پسيحيولوگيالىق تۇرعىدان دايىن بولدىم. ويتكەنى، وزىمدە وسىنداي جارىستى اڭساپ جۇرگەن بولاتىنمىن.
- ءسىزدى ينگۋشەتيا قالاي قارسى الدى؟ قارسىلاستارىڭىز الدىن الا انىقتالدى ما؟
- ينگۋشەتيا ەل ۇشاقتان تۇسكەن ساتتەن باستاپ اياعىمىزدى جەرگە تيگىزبەي كۇتىپ الىپ، ەڭ كەرەمەت دەگەن قوناقۇيلەرىنە ورنالاستىردى. جارىسقا دەيىنگى بارلىق جاعدايىمىزدى جاسادى. قارسىلاستار ءار كەزدە ءارقالاي. ءبارى جەرەبەگە بايلانىستى. ەگەر الدىن الا انىقتالىپ جاتسا، وندا ينتەرنەت ارقىلى ونىڭ جەكپە- جەكتەرىن كورىپ دايىندالامىز. بۇل جارىسقا وسال سپورتشى كەلمەيدى. جالپى، م م ا تۋرنيرلەرىنىڭ ىشىندە UFC مىقتى سانالادى عوي. ونىڭ ەرەكشەلىگى جەكپە-جەكتەرى سەگىز بۇرىشتىڭ ىشىندە وتكىزىلەدى. ال M1 Global جارىستارى كادىمگى بوكس سەكىلدى شارشى الاڭدا وتەدى. دەگەنمەن، ەرەجەلەرى، ۇپاي بەرۋ زاڭدىلىقتارى، قولداناتىن ءادىس-تاسىلدەرى بويىنشا وتە ۇقساس، ءتىپتى بىردەي دەسە دە بولعانداي.
- ءسىز سۇلاتقان جىگىت وسى كۇنگە دەيىن جەڭىلمەي كەلگەن ەكەن. ونىڭ وسال تۇسىن قالاي تاپ باستىڭىز؟
- ارينە، بۇل جولى ماعان ساتتىلىك سەرىك بولدى دەسەم بولادى. ونىڭ ۇستىنە جەڭىسكە دەگەن ىنتا- جىگەر دە تۇلا بويىمدى جاۋلاپ العان سەكىلدى. البەتتە، قارسىلاسىم گادجيمۋراد اليەۆتىڭ دە جەڭىلۋ ءۇشىن كەلمەگەنى انىق قوي. ءبىراق، مەن بارىنشا ونىڭ كەمشىن تۇستارىن تەز بايقاپ، ءادىس قولدانۋعا تىرىسىپ باقتىم. اليەۆ وسىعان دەيىن M1 Global تۋرنيرىندە 3-4 كەزدەسۋ وتكىزگەن، ءبىر-ەكى رەت ا س ۆ دوداسىندا دا سىنعا تۇسكەن. تىكەدەن تىك تۇرىپ توبەلەسكەندە دە، پارتەردە دە ونىڭ باسىمدىعى بايقالىپ تۇردى. ءبىراق، مەن ونى نوكاۋتقا تۇسىرەتىن كەزدى ءساتتى پايدالانىپ كەتتىم.
- جەڭگەننەن كەيىنگى كوڭىل- كۇيدىڭ كوتەرىڭكى بولاتىنى تۇسىنىكتى. وسى جەڭىستەن سوڭ قولداۋشىلارىڭىز بەن جانكۇيەرلەرىڭىزدىڭ قاتارى ارتقان شىعار؟
- ءيا، بۇل جەڭىس مەنىڭ اتاق- دارەجەمدى كوتەرۋگە ۇلكەن مۇمكىندىك بەردى. ءوزىم ءتىپتى بۇلاي بولادى دەپ كۇتپەگەن ەدىم. جەكپە-جەكتەن كەيىن تەلەفونىم قوڭىراۋلار مەن قۇتتىقتاعان حابارلامالارعا تولىپ قالدى. اۋەلى اتا-انام حابارلاسىپ، قۇتتىقتادى. ارتىق ايتقانىم ەمەس، جەكە وزىمە قوڭىراۋ شالىپ 3000 داي ادام حابارلاستى-اۋ دەيمىن. وسىنىڭ ءبارى ماعان ۇلكەن كۇش- قۋات سىيلايدى. ەندى تەك ەڭبەكتەنۋ كەرەك. ءوزىمنىڭ ارمانىم - الەم مويىنداعان چەمپيونعا اينالۋ. مەيلىنشە بيىك ماقسات قويساق، سوعۇرلىم سوعان جەتۋ وڭايىراق بولادى. سوندىقتان قازاقتىڭ اتىن شىعارار سپورتشى بولسام دەپ ارماندايمىن. جانە وعان جەتەتىن مۇمكىندىكتەر مەندە بار.
- ال جەكپە- جەكتەرگە تاكتيكانى قالاي تاڭداپ الاسىز؟
- ەگەر قارسىلاسىم بالۋان بولسا وندا ونىمەن بارىنشا تىك تۇرىپ توبەلەسۋگە تىرىسامىن. سەبەبى بالۋاندار پارتەردە، ياعني، جاتىپ توبەلەسكەن كەزدە ءوز ىڭعايىنا قاراي جىعىپ الىپ، جەڭىپ كەتۋى مۇمكىن. ال نەگىزىندە ءوزىم قورعانىستا ءجۇرىپ العاندى، سىلبىر توبەلەسكەندى، ءتۇرلى قيتۇرقى ايلا-ارەكەتتەردى قولدانعاندى قالامايمىن. مەيلىنشە، اشىق توبەلەس كورسەتپەۋگە تىرىسامىن. سوندا جەڭىلگەن قارسىلاس تا جەكپە- جەكتەن كەيىن اناۋ- مىناۋ دەپ ءسوز ايتپايدى.
- ال ءوزىڭىز وسىعان دەيىن سپورتتىڭ قاي تۇرلەرىمەن اينالىستىڭىز؟ قازىرگى سپورتتىق فورماڭىز بەن جەتىستىگىڭىزگە كوڭىلىڭىز تولا ما؟
- پاۆلودار وبلىسى، باياناۋىل اۋدانى، جوسالى دەگەن اۋىلدا دۇنيەگە كەلدىم. ءبىراق 3 جاسقا تولعان كەزىمدە وتباسىمىزبەن الماتى وبلىسى بەساعاش قالاسىنا كوشىپ كەتتىك. قازىر وسىندا تۇرامىز. بەساعاشتا وقىپ جۇرگەن كەزىمىزدە 7-سىنىپتان باستاپ بوكسقا قىزىقتىم. العاشقىدا مەنى ازات حاسانوۆ دەگەن باپكەر جاتتىقتىرعان. كەيىن ەرلان تاتتىبايەۆتىڭ قول استىندا جاتتىقتىم. التى جىل بويى ەرلان اعايىم جاتتىقتىردى، باپتادى، جارىستارعا الىپ باردى. شارشى الاڭدا شىڭدالۋىما كومەكتەستى. ءبىراق، بوكستا كوپ تۇراقتاپ قالا المادىم. سەبەبى كوپتەگەن جارىستا ادىلەتسىزدىكتەرگە تاپ بولدىم، كوپە- كورنەۋ قارسىلاستارىمنىڭ قولىن كوتەرگەن ساتتەر كوبەيىپ كەتتى. وسىدان كەيىن بوكستى تاستاپ، دجي-دجيتسۋمەن اينالىستىم. سپورتتىڭ بۇل تۇرىنەن قازاقستان چەمپيوناتىن ءۇش رەت جەڭگەننەن كەيىن كيكبوكسقا كوشتىم. بۇل جەردە دە قازاقستان بويىنشا قارسىلاس شاق كەلتىرمەگەن ەدىم. سودان 2014 -جىلى ءبىر كۇنى سپورت زالدا جاتتىعىپ جاتقان كەزىمدە پەتروپاۆل قالاسىندا م م ا ەرەجەسىز جەكپە- جەگىنەن قازاقستان چەمپيوناتى وتەتىنىن ەستىپ قالدىم.
كەلىپ، تىركەلىپ، سالماق ولشەگەننەن كەيىن العاشقى جەكپە-جەكتەردى قاراپ تۇرعانمىن. ءبىر كەزدە ەكى جىگىت بىرىنەن سوڭ ءبىرى ءبىر-ءبىرىن وڭدىرماي تەۋىپ قۇلاتىپ ءتۇسىردى. وسى كورىنىستەن سوڭ مەندە ءبىرتۇرلى قورقىنىش پايدا بولىپ، ءسال قوبالجىپ قالدىم. ويتكەنى، قانشا دەگەنمەن ەرەجەسىز عوي. دەگەنمەن، جەكپە-جەككە شىققان كەزدە بويىمدا سەنىمدىلىك پايدا بولىپ، تەك جەڭىسكە ۇمتىلۋمەن بولدىم. بۇل ماقساتىم ناتيجەسىز بولعان جوق، سول جولعى تۋرنير كۋبوگىن جەڭىپ العان بولاتىنمىن ءوز سالماعىمدا. ال قازىرگى ءوزىمنىڭ سپورتتىق جاعدايىما كوڭىلىم تولادى. بۇل ەندى بولدىم-تولدىم دەۋ ەمەس، دەسە دە بارلىعىنا سابىرمەن بىرتىندەپ جەتۋدى قالايتىن اداممىن. وسى ءىرى جەڭىسكە جەتكەننەن كەيىن M1 Global ۇيىمداستىرۋشىلارى ماعان وزدەرى كەلىپ، «سەنىمەن كەلىسىمشارتقا وتىرامىز» دەپ ايتتى. ءقازىر سول كەلىسىمشارتتى كۇتىپ وتىرمىز.
- سپورتشى رەتىندە اتاق پەن قاتار اقشا دا كەرەك عوي. تابىس جاعىن قالاي رەتتەپ جاتىرسىز؟
- قازىرگى تاڭدا مەن «مۇستافا وزتۇرىك» سپورتتىق كلۋبىنىڭ مۇشەسىمىن، سول جەردە قىزمەت اتقارامىن. سول ورتالىقتىڭ پرەزيدەنتى مەيىربەك قايىر سەيسەبەك دەگەن اعامىز ۇنەمى قولداۋ كورسەتىپ وتىرادى. ول كىسى رۋحاني قولداۋ ءبىلدىرىپ، جول كورسەتىپ، اقىلىن اياماي، قاراجات جاعىن دا ءوز مويىنىنا الىپ، كومەك كورسەتەدى.
سوندىقتان ول كىسىگە دەگەن العىسىم شەكسىز. وسىنداي جاعداي جاساپ وتىرعاندا مەن تەك جەڭىستەرگە جەتۋىم كەرەك. قازىرگى كەزدە نۇرلان امانقۇلوۆ جانە نۇرلان مامىراليەۆ دەگەن بىلىكتى باپكەرلەرىممەن بىرگە جاتتىعىپ ءجۇرمىن. وتباسىم دا قولداۋشىلارىم رەتىندە اركەز قاسىمنان تابىلادى. اكەم كەڭەس وداعى كەزىندە سامبومەن اينالىسقان. سپورتقا دەگەن قىزىعۋشىلىق، جەڭىسكە دەگەن جىگەر سول كىسى ارقىلى قانمەن كەلگەن قاسيەت شىعار دەپ ويلايمىن. ال انام بولسا باستاپقىدا سپورتقا كەلۋىمە قارسى بولدى. ونىڭ ۇستىنە جەكپە-جەك وتە قيىن سپورت ءتۇرى. اياعىڭدى اۋىرتىپ الاسىڭ، جاراقات الىپ قالاسىڭ دەپ ۇنەمى الاڭداپ وتىرادى. ءدال قازىرگى ساتتە ەشقانداي جاتتىعۋ جۇمىستارى ءجۇرىپ جاتقان جوق. سەبەبى، اللا قالاسا 16 -تامىزعا ۇيلەنۋ تويىمدى جوسپارلاپ وتىرمىن. سودان كەيىن بىردەن سپورتتىق كۇن تارتىبىنە كوشەمىن.