07:35, 29 - تامىز 2017 | GMT +6
تورەشىلەر شەشىمى قايتا قارالدى: ءجۇسىپوۆ الەم چەمپيوناتىن جالعاستىرادى
استانا. قازاقپارات - گەرمانيانىڭ گامبۋرگ قالاسىندا ءوتىپ جاتقان بوكستان الەم چەمپيوناتىندا قازاقستاندىق ابىلايحان جۇسىپوۆپەن ايقاسقان يتاليالىق ۆينچەنتسو ماندجاكاپرەنى جەڭىمپاز دەپ تانىعان تورەشىلەردىڭ شەشىمى قايتا قارالدى، دەپ حابارلايدى قازاقپارات.
ەسكە سالساق، بۇگىن 69 كەلى سالماق دارەجەسىندە ابىلايحان ءجۇسىپوۆ پەن يتاليالىق ۆينچەنتسو ماندجاكاپرەنىڭ جەكپە-جەگى ءوتتى. ءۇشىنشى راۋندتا وتانداسىمىزدىڭ جاراقات الۋىنا بايلانىستى تورەشى جەكپە-جەكتى توقتاتىپ، ونى ارى قاراي جالعاستىرۋعا جول بەرمەدى.
وسىلايشا جەڭىس يتاليالىقتىڭ قانجىعاسىنا بايلاندى. كەيىننەن قازاقستاندىق تاراپ تورەشىلەر شەشىمىنىڭ قايتا قارالۋىنا قول جەتكىزدى.
سەبەبى بوكسشىلاردىڭ ايقاسى توقتاتىلعان ۋاقىتتا ەسەپ ايىرماسى بويىنشا ءجۇسىپوۆ الدا كەلە جاتقان ەدى. سپورتشىمىزعا قوسىمشا مەديتسينالىق تەكسەرۋ قاجەت بولدى. تەكسەرۋ ناتيجەسى ءجۇسىپوۆتىڭ قاباعىنا العان جاراقاتى بولماشى بولعانىن جانە جەكپە-جەكتى توقتاتۋدىڭ قاجەتى بولماعانىن كورسەتتى.