قازاقستان قۇراماسى كوكپاردان الەم چەمپيونى اتاندى - فوتو
«قازاناتتى» لىق تولتىرعان قازاق جانكۇيەرلەرى كوكپارشىلارعا ءبىر كىسىدەي قولداۋ ءبىلدىردى. وسىدان بولار، الاڭعا رۋحتانىپ شىققان قازاق جىگىتتەرى العاشقى مينۋتتاردا-اق باسىمدىعىن تانىتا ءبىلدى. نەبارى 3 مينۋتتىڭ وزىندە سىتىلىپ العا شىققان تەمىرحان ايتبايەۆ العاشقى سالىمدى ءوز قۇراماسىنىڭ ەنشىسىنە سالىپ، جانكۇيەرلەردى ءبىر سەرپىلتىپ تاستادى. تاقىمى تەمىردەي تەمىرحاننىڭ سوڭىن الا 8- مينۋتتا باقتىباي شىرىنقۇلوۆ ەسەپتى ەسەلەسە، 10 مينۋتتا ابىلايحان نىشانبەك ەسەپتى 3:0-گە جەتكىزدى.
دەسە دە، قىرعىزدار ءبىرىنشى كەزەڭدە ءبىر سالىم ۇلگەرىپ كەتتى. 19 مينۋتتاعى رۋستام تىناليەۆتىڭ شەڭبەردى ەڭسەسى تۇسىڭكىرەپ وتىرعان ايىرقالپاقتى اعايىنداردىڭ كوڭىلىن ءبىر سەرپىلتىپ تاستادى. ءبىرىنشى كەزەڭنىڭ قورىتىندىسى بويىنشا 3:1 ەسەبىمەن قازاقستان قۇراماسى العا شىقتى.
ەكىنشى كەزەڭدى قازاق كوكپارشىلارى الەكساندر پۋپەنكونىڭ سالىمىمەن باستادى. قازاقتىڭ «سارى بالاسىنىڭ» مىعىمدىعى ەشكىمنەن كەم تۇسپەيدى ەكەن. بۇدان كەيىنگى تارتىس تەڭ دارەجەدە ءوربىدى.
ايىر قالپاقتى اعايىننىڭ كوكپارشىلارى از ۋاقىتتىڭ ىشىندە ەسەپ ايىرماسىن قىسقارتا المادى. وسىلايشا، قازاقستان قۇراماسى الەم چەمپيوناتىنىڭ تۇڭعىش جەڭىمپازى اتاندى.
ەسكە سالا كەتسەك، كوكپار ويىنىنان حالىقارالىق چەمپيونات ەل تاريحىندا تۇڭعىش رەت بولىپ ءوتتى. سايىسقا تۇركى تىلدەس ەلدەرمەن بىرگە ا ق ش كومانداسى دا قاتىستى. تارتىستى چەمپيوناتتىڭ قولا جۇلدەسىن تاجىكستان كومانداسى ۇتىپ الدى. جالپى جۇلدە قورىنا 18 ميلليون تىگىلگەن. چەمپيوناتقا 11 كوماندادان (قازاقستان، قىرعىزستان، ۆەنگريا، قىتاي، تۇركيا، تاجىكستان، وزبەكستان، ا ق ش، موڭعوليا، رەسەي، اۋعانستان) 300 گە تارتا كوكپارشى قاتىستى.
