قازاقستاندىق كارتينا حالىقارالىق كينوفەستيۆالدىڭ باس جۇلدەسىن جەڭىپ الدى - فوتو
فەستيۆالگە ازەربايجان، بولگاريا، ءۇندىستان، يندونەزيا، قازاقستان، كورەيا، تۇركيا، حورۆاتيا جانە باسقا دا ەلدەردىڭ كينەماتوگرافتارى قاتىستى.
قازاقستاندىق دەلەگاتسيا قۇرامىندا «اناعا اپارار جول» فيلمىندە باستى رولدەردى سومداعان ءادىل احمەتوۆ، التىناي نوگەربەك، سونداي- اق، حورۆاتياداعى قر ەلشىلىگىنىڭ قىزمەتكەرلەرى بولدى.
«سىزدەردىڭ فيلمدەرىڭىز ەرەكشە اتموسفەراسىمەن، ءتۇسىرىلىم جانە اكتەرلەر توبىنىڭ تاماشا جۇمىسىمەن ەرەكشەلەنەدى. ءبىز فيلمدەگى انا مەن بالا ماحابباتى ارقىلى سىزدەردىڭ ەلدەرىڭىزدىڭ تاريحىمەن تانىستىق. ءفيلمنىڭ باس پروديۋسەرى ءاليا نازاربايەۆاعا وسى ەڭبەگى ءۇشىن العىس ايتامىز»، - دەدى فەستيۆال ديرەكتورى، بەلگىلى رەجيسسەر ءارى پروديۋسەر يگور پريزميچ.
«ماركو پولو» فەستيۆالىنىڭ ءادىل قازىلارى «اناعا اپارار جول» كينو كارتينكاسىنا فەستيۆالدىڭ باس جۇلدەسى «ۇزدىك فيلم» اتىلىمى مەن قازاقستاندىق دەلەگاتسيا مۇشەلەرىنە ديپلومدار مەن ماراپاتتار تابىستادى.
«ءبىز ءۇشىن وسىنداي اسەرلى فيلم ارقىلى قازاقستاننىڭ تاريحى مەن مادەنيەتىن شەتەلدىكتەرگە تانىتۋ ۇلكەن ماقتانىش. ءبىز كورەرمەندەردىڭ شىنايى كوز جاسىن كورىپ، جىلى لەبىزدەرىنە بولەندىك»، - دەيدى التىناي نوگەربەك.