قوستاناي وبلىسىندا «التىن» جاستار ىزدەستىرىلۋدە
بۇل تۋرالى جۋرناليستەرمەن وتكەن باسپا ءسوز ءماسليحاتىندا «نۇر وتان» پارتياسى جانىنداعى «جاس وتان» جاستار قاناتى وبلىستىق فيليالىنىڭ ءتوراعاسى ەرلان تولەتايەۆ حابارلادى، دەپ حابارلايدى قازاقپارات kostanaytany.kz سايتىنا سىلتەمە جاساپ.
جاستاردىڭ قۇرمەت كىتابىنا ەنۋ ءۇشىن ۇمىتكەرلەردىڭ جاس مولشەرى 14-29 ارالىعىندا بولۋى شارت. بارلىق وتىنىشتەر 25 -قازانعا دەيىن جولدانۋى ءتيىس.
«جاستاردىڭ التىن كىتابىنا ەنۋ ءۇشىن ۇمىتكەرلەر وتىنىشپەن قوسا، وزدەرىنىڭ بەلگىلى ءبىر سالا بويىنشا جەتكەن جەتىستىكتەرى جايلى ماعلۇماتتار بەرۋى ءتيىس. جانە دە ول ءبىزدىڭ وبلىستىڭ تۇرعىنى بولۋى كەرەك. كەيىن ارنايى قۇرىلعان كوميسسيا بارلىق ۇمىتكەردىڭ اراسىنان ون ادامدى ىرىكتەپ الادى»، - دەيدى ەرلان تولەتايەۆ.
بيىلعى جىلدىڭ تاعى ءبىر ەرەكشەلىگى - «وبلىس جاستارىنىڭ التىن كىتابى» لاۋرەاتتارىنىڭ كلۋبى قۇرىلماق. بۇل جاستاردىڭ ەرىكتى بىرلەستىگى بولماق. وندا ەسىمى قۇرمەتتەلگەن جاندار وڭىردە قالىپتاسقان پروبلەمالاردى بىرلەسىپ تالقىلاپ، ءتۇرلى ماسەلەلەردى شەشۋدە ءتيىستى باستامالار كوتەرە الادى.
«كەيدە «جاستاردىڭ التىن كىتابىنا» ەسىمدەرى بەلگىسىز ادامدار كىرىپ كەتكەن دەپ سىناپ جاتادى. مەنىڭشە، بۇل دۇرىس ەمەس. ءار سالانىڭ مىقتى مايتالماندارى بار. ولار ءوز ىستەرىنە جاۋاپتى. بىلايعى جۇرت ولاردى بىلە بەرمەۋى مۇمكىن. ەرلىك ءبىر كۇندە جاسالمايدى. اتى اتالعان كىتاپتا جۋرناليستيكا، سپورت، ءبىلىم مەن عىلىم، مادەنيەت، دەنساۋلىق ءتارىزدى اتالىم كوپ. كەي جىلدارى ولاردىڭ ءبىرقاتارى الىنىپ تاستالادى. ءبىر جىل وتكەندە ولار بۇل اتاققا قايتا ورالۋى مۇمكىن»، - دەيدى وبلىستىق جاستار ءىسى جونىندەگى باسقارما باسشىسى كەنەش ءالىمجانوۆ.
ايتا كەتەيىك، قوستانايدا «جاستاردىڭ التىن كىتابى» 2005 -جىلى جارىق كورگەن بولاتىن. 2010 -جىلى كىتاپتىڭ ءبىرىنشى تومى اياقتالدى. قازىر ەكىنشى تومى بار. وسى ۋاقىت ارالىعىندا «التىن كىتاپقا بارلىعى 184 لاۋرەات ەنگىزىلگەن.