ەكسپو: قىتاي پاۆيلونىندا جوعارى ءسان ۇلگىسىنىڭ كورسەتىلىمى ءوتتى - فوتو
«شاراعا قاتىسۋ مۇمكىندىگى بەرىلگەنىنە وتە قۋانىشتىمىن. ەكسپو - ءتۇرلى قىزمەت سالالارىنداعى ادامزاتتىڭ جاڭا جەتىستىكتەرىن كورسەتەتىن ماڭىزدى پلاتفورما. «ەكسپو-2017» - ورتالىق ازيادا وتكىزىلىپ جاتقان العاشقى كورمە جانە قالىڭ كوپشىلىكتىڭ نازارىن اۋدارا ءبىلدى. قىتاي پاۆيلونى «بولاشاقتىڭ ەنەرگياسى. جاسىل جىبەك جولى» تاقىرىبىنا ارنالعان. مۇندا قىتايدىڭ ءداستۇرلى ەنەرگيا كوزدەرىن قولدانۋدان جاڭا بالامالى كوزدەرگە دەيىنگى بارلىق وزگەرىستەر پروتسەسى مەن بۇل سالاداعى قىتايدىڭ تابىستى جاڭالىقتارى تانىستىرىلادى. ەكسپو الاڭى ەنەرگەتيكا سالاسىنداعى جاڭا جەتىستىكتەردى عانا كورسەتپەيدى، بارلىق مەملەكەتتەرگە ءوزارا مادەني- گۋمانيتارلىق قارىم- قاتىناس ورناتۋعا مۇمكىندىك بەرەدى. «جىجياڭ كەين» ديزاينەرلىك كومپانياسى بۇل كورسەتىلىمدە ءوزىنىڭ اشىق ءتۇستى كيىمدەرىمەن قىتاي رۋحىن، قىتاي مادەنيەتىن كورسەتەدى. قازاقستاندىق دوستار قىتاي مادەنيەتىن تەرەڭىرەك تانيتىن بولادى»، - دەپ اتاپ ءوتتى قۇتتىقتاۋ سوزىندە قىتاي پاۆيلونى ديرەكتورىنىڭ ورىنباسارى جۋاڭ ۆي.
ءوز كەزەگىندە ق ر ءماجىلىسىنىڭ دەپۋتاتى مەرۋەرت قازبەكوۆا قىتايلىق تاراپقا كورمەگە بەلسەندى قاتىسقاندارى ءۇشىن العىس ءبىلدىردى.
«قازاقستان پارلامەنتى اتىنان بارشاڭىزدى قۇتتىقتايمىن جانە شارانى ۇيىمداستىرعان كومپانيا مەن قىتاي ونەر اكادەمياسىنا العىس بىلدىرگىم كەلەدى. قازاقستاندا ديزاينەرلىك بيزنەس ايتارلىقتاي دامىعان، مەنىڭ ويىمشا جاقىندا بىرلەسكەن جوبالاردى كورەتىن بولامىز»، - دەدى ول.
«توپتاما اتاۋى «اسپان استى جولىنىڭ جىبەك جىپتەرى» دەپ اتالادى. بۇل كوللەكسيا قىتايلىق ونەر اكادەمياسىنىڭ سۋرەتشىلەرىمەن بىرلەسىپ جاسالدى. اتاپ ايتقاندا، ولاردىڭ كارتينالارىنان العان شابىتتىڭ ارقاسىندا دۇنيەگە كەلدى. توپتامانىڭ العاشقى اق-قارا ءتۇستى بولىگى قىتايدىڭ ءداستۇرلى ستيلىندە سالىنعان كارتينالار ىسپەتتى. ەكىنشى زاماناۋي بولىگى وتە اشىق جانە قىتاي قالالارىن بىلدىرەدى. كارتينالار اۆتورى قىتاي كوركەم ديزاين اكادەمياسىنىڭ پرورەكتورى جوۋ گاڭ. كارتينالار اتاۋى - «ايداھار قالالار». ال ونداعى قىزىل ءتۇس زاماناۋي قالاداعى ايەلدى مەڭزەيدى»، - دەپ ءتۇسىندىردى توپتاما اۆتورى، ديزاينەر جاڭ ليفۋ جۋرناليستەرگە بەرگەن سۇحباتىندا.
ونىڭ ايتۋىنشا، كومپانيا قىتاي نارىعىندا جۇمىس ىستەيدى جانە قىتايدىڭ تانىمال تۇلعالارى مەن بيلىك شەنەۋنىكتەرىن كيىندىرەدى.
«ياعني بيزنەس تە ءبىز ءۇشىن - ونەر. ءبىز توپتامالىق كيىمدەر شىعارىپ قانا قويمايمىز، جالپى حالىقتىق، ورتاشا دەڭگەيلى كيىمدەردى دە تىگەمىز. ماعان استانا ۇنادى، حالقى اشىق جانە قوناقجاي. قالانىڭ ءوزى مەن ەكسپو كورمەسى - وتە زاماناۋي»، - دەپ ءوز ءسوزىن تۇيىندەدى جاڭ ليفۋ.