استاناعا امانگەلدى يمانوۆتىڭ دومبىراسى اكەلىندى
استانا تورىندەگى سورەگە جايعاسقان سول جادىگەرلەر اراسىنان 1916 -جىلى تورعاي دالاسىندا بولعان ۇلت- ازاتتىق كوتەرىلىسىنىڭ باسشىسى امانگەلدى يمانوۆتىڭ دومبىراسىن كوردىك. دومبىرانىڭ قورداعى رەتتىك ءنومىرى - 1619. ۇزىندىعى شامامەن - التى قارىس. شاناعىنىڭ كولەمى سوپاقشا ءھام قاپتالى، بەتى، سىرتقى ساۋىر ءدۇمى بولەك- بولەك شابىلىپ، اسقان شەبەرلىكپەن جىمداستىرا قۇراستىرىلىپتى. پەرنە تاعىلعان قۋ موينىنىڭ شاناقپەن قۇيىسقان تۇسىنان باستاپ، قوس شەكتىڭ بىتەۋ تۇيىعى بەكىتىلگەن شەگەسىنە دەيىن دومبىرانىڭ سىرتى سۇيەكپەن كومكەرىلگەن. ءبىر ەرەكشەلىگى - سۇيەك ساندىك ءۇشىن جاپسىرىلعانى بولماسا، اسپاپتىڭ سازدىق دىبىس- ۇنىنە ەشبىر قاتىسى جوق سياقتى. ماماندار سولاي دەيدى.
جاساۋشى شەبەر دومبىرانىڭ سۇيەك كومكەرىلگەن قاپتالىن ۇزبە ءيىر ورنەكپەن ساندەپ، قاپتال جيەگىن جاعالاتا سۇيەك تۇيمەمەن شەكىتە بەكىتكەن. ال، سىرتقى ءدۇمدى شاناعىنا جالپاق سۇيەكتى ۇزىنشا ءتىلىپ ادەمى قيۋلاستىرىپ، ساۋىر- قاپتالىنا ىلمەلى ورنەك سالعان ەكەن. مۋزەي قىزمەتكەرلەرىنىڭ ايتۋىنا قاراعاندا، دومبىرانىڭ سىرتىنان كيگىزەتىن اسەم قابى دا بولعان كورىنەدى. بۇل جادىگەر 1960 -جىلداردىڭ باسىنا دەيىن بۇرىنعى تورعاي وبلىسىنداعى امانگەلدى يمانوۆتىڭ مەمۋارلىق مۋزەيىندە ساقتالىپ كەلگەن.
دەرەكتى مارقۇم، ەتنوگراف- جازۋشى سەيىت كەنجەاحمەتوۆتىڭ ەستەلىگىنەن الىپ وتىرمىز. سەكەڭ ايتاتىن: «1961 -جىلدىڭ كۇزىندە امانگەلدى يمانوۆتىڭ مەمۋارلىق مۋزەيىنىڭ ديرەكتورى، اتاقتى اقىن نۇرحان احمەتبەكوۆ دەنساۋلىعىنا بايلانىستى جۇمىستان بوساپ، ورنىنا مەن ديرەكتور بولىپ باردىم. قوردا تورعاي ءوڭىرىنىڭ تاريحىنا قاتىستى دۇنيەلەر كوپ ەدى. كەشىكپەي وبلىس جابىلىپ، مۋزەي ەكسپوناتتارى قوستانايعا كوشىرىلەتىن بولدى. مەكەمەنى جابۋ ءۇشىن قوستانايدان پاۆليۆسكي دەگەن ورىس كەلدى. ءسويتىپ، امانگەلدىنىڭ دومبىراسى باستاعان كوپتەگەن جادىگەرلەر وبلىس ورتالىعى قوستانايعا جول تارتتى» دەپتى. سودان بەرى باتىر اتامىزدان قالعان جالعىز جادىگەر قوستانايدىڭ تورىندە تۇر.
ەرلان التاي
Egemen.kz
