ەكسپو-نىڭ ەڭ تانىمال پاۆيلوندارى بەلگىلى بولدى

بۇل تۋرالى بۇگىن كورمەنىڭ 1 ايلىق جۇمىسىن قورىتىندىلاعان «استانا ەكسپو-2017» ۇلتتىق كومپانياسى حالىقارالىق قاتىسۋشىلار جۇمىس دەپارتامەنتىنىڭ ديرەكتورى ءىليا ورازاقوۆ ءمالىم ەتتى، دەپ حابارلايدى قازاقپارات.

«تانىمال پاۆيلوندارعا قاتىستى ايتار بولساق، تۇراقتى جاريالاپ كەلە جاتقان بۇل رەيتينگ ايتارلىقتاي وزگەرە قويعان جوق. كەلۋشىلەردىڭ اراسىندا جوعارى تانىمالدىق يە پاۆيلونداردىڭ قاتارىندا رەسەي، وزبەكستان، گەرمانيا، ءۇندىستان جانە وڭتۇستىك كورەيا ەلدەرى بار. كەلۋشىلەردىڭ توپ ەلدەرىنىڭ وسىناۋ رەيتينگىسىنە افريكا پاۆيلونىنىڭ دا قوسىلۋى قۋانتارلىق جايت»، - دەدى ءىليا ورازاقوۆ.

ونىڭ ايتۋىنشا، قازىرگى ۋاقىتتا كورمەگە كەلۋشىلەردىڭ افريكا ءوڭىرىنىڭ ەكزوتيكالىق ەلدەرىنە دە زور قىزىعۋشىلىق تانىتا باستاعاندىعى بايقالادى. «قاتىسۋشىلاردىڭ ايتارلىقتاي توسىن جايتتارعا ۇرىنۋى تىركەلگەن جوق. بارلىق دا شتاتتىق رەجىمدە ءوتىپ جاتىر. قاتىسۋشىلارعا بارىنشا ىڭعايلى جاعداي جاساۋعا تىرىسۋدامىز. ءبىزدىڭ بايقاۋىمىزشا قاتىسۋشىلاردىڭ وزدەرى دە كورمە قوناقتارىمەن اڭگىمەلەسۋگە قۇلىقتى. قوناقتار ءۇشىن وزدەرىنىڭ كورمەگە قاتىسۋىن بارىنشا تارتىمدى جاساۋعا باسا ءمان بەرۋدە»، - دەدى ول.

ايتا كەتەرلىگى، بۇعان دەيىن «استانا ەكسپو-2017» ۇلتتىق كومپانياسىنىڭ باسقارۋشى ديرەكتورى بەيبىت قارىمساقوۆ 1 ايدىڭ ىشىندە«ەكسپو-2017» حالىقارالىق مامانداندىرىلعان كورمەسىن 920 مىڭنان استام كەلۋشى تاماشالاعاندىعىن ايتقان بولاتىن.