استانادا الماتى وبلىسىنىڭ مادەنيەت كۇندەرى وتەدى

 11-15-  شىلدە كۇندەرى الماتى وبلىسىنىڭ 350-گە جۋىق ونەر ۇجىمى مەن قولونەر شەبەرلەرى ەكسپو قوناقتارىنا ارناپ ءوز ونەرلەرىن كورسەتەتىن بولادى.

 «الماتى وبلىسى ەلىمىزدەگى ىرگەلى، ءىرى، اۋىل شارۋاشىلىعى دامىعان، ونەركاسىبى العا جىلجىعان، 2 ميلليون حالقى بار ءوڭىرى. سوندىقتان ەكسپو-2017 كورمەسى اياسىندا ۇيىمداستىرىلعان مادەني كۇندەرگە تياناقتى دايىندىقپەن كەلە جاتىرمىز»، - دەدى الماتى وبلىسى اكىمىنىڭ ورىنباسارى ومار جاقسىلىق ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

اكىم ورىنباسارىنىڭ حابارلاۋىنشا، الماتى وبلىسىنىڭ استاناداعى مادەني كۇندەرى 11 - شىلدە كۇنى «قازاقستان» ورتالىق كونسەرت زالىندا «جەتىسۋ - جۇماق مەكەنىم» اتتى جەتىسۋ ونەر شەبەرلەرىنىڭ كونسەرتىمەن اشىلادى. وسى كۇنى كەشكى ساعات 18.30-دا جاستار تەاترىندا ب. ريموۆا اتىنداعى وبلىستىق دراما تەاترىنىڭ «رومەو مەن دجۋلەتتا» سپەكتاكلى قويىلادى. م. تىنىشپايەۆ اتىنداعى ولكەنتانۋ مۋزەيى، كوركەمسۋرەت گالەرەياسى جانە داركەمباي شوقپار ۇلى اتىنداعى ونەر مۇراجايىنىڭ شەبەرلەرى ەتنواۋىلدا ارنايى كورمە ۇيىمداستىرادى.

 8-9 - شىلدە كۇندەرى استانادا «قازاقستان» سپورت كەشەنى الدىنداعى الاڭدا الماتى وبلىسىنىڭ اۋىلشارۋاشىلىق جارمەڭكەسى وتەدى. وعان جەتىسۋ وڭىرىنەن ءبىر ميلليارد تەڭگە سوماسىنا 4 مىڭ تونناعا جۋىق ءونىم جەتكىزىلەدى. 14-15 - شىلدە كۇندەرى «قازانات» يپپودرومىندا وڭىرلىك سپورتشىلار تەڭگە ءىلۋ، جامبى اتۋ، قىز قۋۋ، اۋدارىسپاق سىندى ۇلتتىق سپورت تۇرلەرىن كورسەتەدى.

جەتىسۋدا اسىرەسە، قۇسبەگىلىك ونەرى ەرەكشە دامىعان. «قازاقستاندا 70-تەن استام بۇركىت تىركەلسە، ونىڭ 50- ءى الماتى وبلىسىندا تىرشىلىك ەتەدى. سايكەسىنشە، قازاقستان بۇركىتشىلەرىنىڭ 80 پايىزى الماتى وبلىسىنىڭ قۇسبەگىلەرى. بۇركىتتەن باسقا، جەتى قازىنانىڭ ءبىرى بولىپ سانالاتىن قۇماي تازىلاردىڭ دا دەنى الماتى وبلىسىندا تىركەلگەن»، - دەدى ج. ومار.

 شارانىڭ جابىلۋ ءراسىمى 15 - شىلدە كۇنى ەكسپو اۋماعىنداعى امفيتەاتردا وتەدى.

 اۆتور: ايجان سەرىكجان قىزى