ەكسپو: يتاليانىڭ ءاربىر وبلىسى ءوز جەتىستىكتەرىن كورسەتۋگە كىرىستى

اتالعان ايماقتار بالامالى ەنەرگيا جوبالارىمەن بىرگە ءاربىر وبلىسقا ءتان تاۋارلار مەن بۇيىمداردى الىپ كەلدى، دەپ حابارلايدى قازاقپارات ءتىلشىسى.

يتاليانىڭ ورتالىق ايماقتارىن بىرىكتىرىپ كورسەتۋدىڭ وزىندىك ءمانى بار. بۇگىندە ماركە، توسكانا مەن ۋمبريانىڭ الەۋمەتتىك- ەكونوميكالىق بايلانىسى تىعىز. دەگەنمەن، ءاربىر ايماقتىڭ وزىنە ءتان ءوندىرىسى مەن كاسىبى بار.

ماسەلەن، ماركە كاسىپكەرلىكتى دامىتۋ جاعىنان وق بويى وزىق كەلەدى. ادريات مۇحيتى بويندا ورنالاسقان كۋرورتتارعا تۋريستەر ءجيى بارادى. وسى ايماقتىڭ وندىرىستىك الەۋەتى دە جوعارى. بىلعارى، اياق كيىم، توقىما، اعاش پەن جيھاز، مەحانيكا، تاماق ونەركاسىبى، كەمە جاساۋ - ءبارى-ءبارى ماركەنىڭ ءداستۇرلى سالالارى.

وعان قوسا، جاڭا تەحنولوگيالار نەگىزىندە يننوۆاتسيالىق ءوندىرىس ورىندارى دا جاقسى دامىپ كەلەدى. توكسانا - ايماعى ەۋروپانىڭ قاق ورتاسىندا ورنالاسقان. ەكونوميكاسى سان سالالى. سودان بولار، ول جەردە مىڭداعان كومپانيا جۇمىس ىستەيدى. يتالياداعى بىلىكتى مامانداردىڭ ءبىرازى سول جەردە ەڭبەك ەتەدى. سەبەبى ايماق باسشىلىعى ءوز كاسىبىن جاقسى بىلەتىن ادامداردى ۇستاپ قالۋعا تىرىسادى.

وسىنىڭ ارقاسىندا گەوتەرميا، بيوماسسا، جەل مەن سۋ ەنەرگەتيكاسى، ينتتەلەكتۋالدى جۇيەلەر جانە تاعى باسقا سالالار ويداعىداي دامىپ جاتىر. ال ۋمبريا - ماركە مەن توسكانانىڭ اراسىندا جاتقان ايماق. ول جەردە اۋىل شارۋاشىلىعىن دامىتۋ شارالارىنا باسىمدىق بەرىلەدى. سونداي-اق قولونەر سالاسى جاقسى دامىعان.

«ءبىز ءاربىر ايماقتىڭ ەرەكشەلىگىن كورسەتە وتىرىپ، ۇشەۋىنىڭ بايلانىسىن - ءوزارا سينەرگياسىن كورسەتۋدى كوزدەيمىز. ماركە، توسكانا مەن ۋمبريا يتاليانىڭ «ورتالىعى» بولىپ سانالادى. ءۇش ايماقتىڭ اراسىندا ينتەللەكتۋالدى، مادەني-تاريحي جانە الەۋمەتتىك قارىم-قاتىناس جاقسى. دەگەنمەن، ءاربىر ايماق ءوز ەرەكشەلىگىن ساقتاۋعا تىرىسادى»، - دەيدى ماركە ايماعىنىڭ ۆيتسە-پرەزيدەنتى اننا كازيني.

ەنەرەگەتيكا سالاسىنداعى جەتىستىكتەردەن بولەك يتاليا ايماقتارى كەراميكا كورمەسىن دە اشتى.

اۆتور: ارمان اسقاروۆ