ەكسپوعا كەلگەن امەريكالىق جۋرناليست استاناداعى كورمەنى سىناپ تاستادى

پاۆيلوندى ارالاعان دجەيمس پالمەر استاناداعى ەكسپو كورمەسىن تاماشالاۋشى ادامداردىڭ تىم از ەكەنىن جازعان دەپ حابارلايدى kazday.kz سايتىنا سىلتەمە جاساعان NUR. KZ.

«قازاقستان حالىقارالىق كورمە وتكىزىپ، ەلدىڭ ابىرويىن كوتەرۋ ءۇشىن فۋتۋريستىك قالا سوقتى، ءبىراق ءبىر كىشىگىرىم پروبلەما بار: استانا قوناق شاقىرۋدى ۇمىتىپ كەتكەن»، - دەپ باستايدى ءوز رەپورتاجىن جۋرناليست دجەيمس پالمەر.

«گرەكيانىڭ پاۆيلونىن مەن جالعىز ءوزىم ارالادىم. كوپشىلىك پاۆيلونداردا قىزمەت كورسەتۋشىلەردەن باسقا ەشكىم بولمادى. تەك قىتاي، گەرمانيا، ا ق ش سەكىلدى ءىرى ەلدەردىڭ پاۆيلوندارىندا ونداعان ادام بولدى. الايدا كوپشىلىك ەلدەردىڭ پاۆيلوندارىنىڭ سىرتىنان مەن بوس قورشاۋلار ارقىلى ءوتتىم. كورمەدەگى ءۇش ادامنىڭ ەكەۋى بەيدجيك تاققان»، - دەيدى جۋرناليست.

ءوز رەپورتاجىندا ول، استانانىڭ پوستكەڭەستىك كەڭىستىكتە ەكسپونى قابىلداپ جاتقان تۇڭعىش مەملەكەت ەكەنىن اتاپ وتكەن.

«مەن 2010-جىلى شاڭحايداعى ەكسپودا بولعان كەزىمدە كورمەگە 73 ميلليون ادام كەلدى. رەسمي مالىمەتتەر بويىنشا استانا ەكسپو كورمەسىنە 670 مىڭ بيلەت ساتقان، الايدا بۇل سيفردىڭ شىنايىلىعىنا قاتىستى كۇمان بار»، - دەپ جازادى جۋرناليست.

ول ەكسپوعا كەلەتىن تۋريستەردىڭ سانى تۋرالى بولجامدى وزگەرتە بەرگەنى ءۇشىن ۇيىمداستىرۋشىلاردى كىنالاعان. سونداي-اق پالمەر جەرگىلىكتى تۇرعىنداردى اشۋلاندىرۋ ءۇشىن بوراتتى ايتسا جەتكىلىكتى ەكەنىن جازادى.

«جىل سايىن قازاقستاندىق ۇيىمداستىرۋشىلار ءۇش ايلىق ءىس-شارانىڭ بولجامدى كەلۋشىلەر سانىن تومەندەتىپ وتىردى - 5 ميلليون، 3 ميلليون، ەندى 2 ميلليون. اشىلۋ سالتاناتىندا، رەسمي دەرەكتەرگە سايكەس، 10 مىڭ كەلۋشى بولعان، ءبىراق ول تىم اسىرا باعالاۋ. كەلەسى كۇنى ادامدار ودان دا از بولدى»، - دەپ جازادى جۋرناليست.

جۋرناليستىڭ پىكىرىنشە، قازاقستان تاراپى شەتەلدەن تۋريست تارتۋعا كوپ كوڭىل بولمەپتى.

«استانانىڭ باسىم بولىگى وتە كورىكتى. ءبىراق ول دا جارتىلاي بوس جانە قوناق ۇيلەرى دە اسا قىمبات»، - دەپ جازادى پالمەر.