ماقسات قۇدراتۋللايەۆ: كەۋدەدەگى جۇدىرىقتاي ەتتىڭ جۇمىسىنا مۇقيات قاراعان ءجون

سىرقاتتاردىڭ كوپتىگى سونشالىق، پەتروپاۆل قالاسىنداعى كارديوحيرۋرگيالىق ورتالىق دارىگەرى، ءبولىم مەڭگەرۋشىسى ماقسات قۇدراتۋللايەۆ 15  جىلدان بەرى جۇرەگى سىزداعان مىڭداعان ناۋقاستىڭ دەرتىنە شيپا بەرۋمەن كەلەدى. بالا كەزدەن دارىگەر بولۋدى ارمانداعان اق حالاتتى ابزال جانمەن دارىگەرلەردىڭ كاسىبي مەرەكەدە Baq.kz تىلشىسىنە سۇحباتتاسىپ قايتتى.

ماقسات قۇدراتۋللايەۆ - اقمولا مەملەكەتتىك مەديتسينالىق اكادەمياسىن ءتامامداعان سوڭ ەڭبەك جولىن اۋىلدان باستاۋدى ءجون ساناپتى. جاس مامان 2002 -جىلى سولتۇستىك قازاقستان وبلىسىنداعى اققايىڭ اۋداندىق اۋرۋحاناسىنا دارىگەر- حيرۋرگ بولىپ جۇمىسقا قابىلدانادى. 4  جىل ەڭبەك ەتكەن سوڭ، بىلىكتى مامانعا ەمدەۋ مەكەمەسىنىڭ حيرۋرگيا بولىمشەسىن باسقارۋ ءىسى سەنىپ تاپسىرىلادى.

«مەن 9-10 جاستان دارىگەر بولۋدى ارماندادىم. ۇيدە اكەم سىيعا تارتقان بىلعارى ديپلوماتىم بولاتىن. مەنەن باسقا ەشكىم وعان قولىن تيگىزبەيتىن. ديپلوماتتىڭ ىشىندە مىندەتتى تۇردە يود، زەلەنكا، باستىڭ جانە ءىشتىڭ ءدارىسى، داكە سىندى العاشقى مەديتسينالىق جاردەم جاساۋعا ارنالعان زاتتاردىڭ بارلىعى تابىلاتىن. ۇيدەگىلەردىڭ نەمەسە كورشىلەردىڭ بىرەۋى اۋىرسا ءدارى بەرىپ، جاراسىن تاڭاتىنمىن. مەنىڭ اكەم دارىگەر بولۋدى ارمانداعان. الايدا وعان قول جەتكىزە المادى. دەگەنمەن ۇزاق جىلدار بويى قۇقىق قورعاۋ ورگاندارىندا تابىستى ەڭبەك ەتتى. «دارىگەر بولسام» دەگەن ارمان مەنىڭ بويىما اكە قانىمەن دارىدى دەپ ويلايمىن. ەگەر بالالارىم وسى كاسىپتى جالعاستىرماق بولسا، مەن تەك قولداۋ كورسەتەمىن» ، - دەيدى ماقسات قۇدراتۋللايەۆ.

2009 -جىلى پەتروپاۆل قالاسىندا كارديولوگيالىق ورتالىق اشىلعاندا ماقسات قۇدراتۋللايەۆ رەنتگەن- حيرۋرگ قىزمەتىنە اۋىستىرىلدى. دارىگەر رەسەي، فرانسيا، ليتۆا، جانە لاتۆيا سىندى شەتەلدەردە ءبىلىمىن شىڭدادى. جۇرەككە انگيوگرافيالىق زەرتتەۋ، كورونارلىق تامىرلاردى ستەندتەۋ وپەراتسيالارىن جاسايدى. ەڭبەكقور دارىگەر ءۇشىن دەرتىنەن ايىققان ەمدەلۋشىلەرىنىڭ العىسىن ەستۋ - زور باقىت.

«كارديوحيرۋرگيالىق ورتالىق اشىلعان كەزدە مامان تاپشى بودى. كۇنىنە 14 وپەراتسياعا دەيىن جاسايتىنبىز. ءۇش جىلداي ەكى دارىگەر عانا جۇمىس ىستەدىك. كۇندىز- ءتۇنى ەڭبەك ەتتىك. جۇرەككە وتا جاسالعاندا ناتيجەسى بىردەن كورىنەدى. ەكىنشى كۇنى- اق سىرقاتتار ءدارىحانا الدىنا سەرۋەنگە شىعادى. ناۋقاستاردىڭ ءتاۋىر بولعانىن كورىپ قۋانامىن. بۇكىل اعزانىڭ جۇمىسى كەۋدەدەگى جۇدىرىقتاي ەتتىڭ جۇمىسىنا بايلانىستى ەكەنىن ۇمىتپاعانىمىز ءجون» ، - دەيدى ماقسات ماديار ۇلى.

جاقسى ءسوز دە جانعا شيپا. ەمدەلۋشىلەرگە دىلى قاباق تانىتىپ، سوزبەن قولداپ وتىرۋ دا سىرقاتتاردىڭ تەز ايىعىپ كەتۋىنە كومەكتەسەدى ەكەن. سوندىقتان دارىگەر ءسال بوس ۋاقىت شىقسا ناۋقاستارمەن اڭگىمەلەسىپ تۇرادى.

«ماعان بۇگىن دياگنوستيكالىق وتا جاسالدى. دارىگەر وتە مۇقيات ادام ەكەن. ءبارىن ەگجەي- تەگجەيلى ءتۇسىندىرىپ بەردى. ءوزىمدى اسا ەشتەڭە مازالامايدى. ءبىراق كارديوحيرۋرگيالىق وپەراتسيا جاساۋ قاجەتتىگى ايتىلدى. سىرقاتىمدى ەكجەي- تەگجەيلى ءتۇسىندىردى. دارىگەرلەردىڭ ەمدەپ جازاتىنا سەنەمىن» ، - دەيدى ەمدەلۋشى نايل ميرزويەۆ.

ماقسات ماديار ۇلى ارىپتەستەرى اراسىندا دا بەدەلدى. بىلىكتى مامان كۇردەلى ماسەلەلەردى شەشۋدە ۇنەمى دۇرىس جول تابا بىلەدى.

«ماقسات ماديار ۇلى وتە ساۋاتتى ادام. كەز كەلگەن سالادان حابارى بار. قولى «التىن» ، جۇرەگى كەڭ. ۇنەمى بىرگە جۇمىس ىستەيمىز. ءاربىر سىرقاتتى اقىلداسىپ ەمدەيمىز. ادامگەرشىلىگى مول. كەز كەلگەن ۋاقىتتا كومەككە دايىن تۇرادى. سەنىمدى ازامات» ، - دەيدى كارديولوگ- دارىگەر تامارا زاحاروۆا.

پەتروپاۆلداعى كارديوحيرۋرگيالىق ورتالىق دارىگەرلەرى سوڭعى ۋاقىتتا جۇرەك تاحيكاردياسىنا وپەراتسيا جاساۋدى قولعا الا باستادى. قازىنادان بولىنگەن 179 ميلليو. تەڭگەگە ارنايى جابدىق ساتىپ الىندى. بۇعان دەيىن تەك استاناعا بارىپ ەم العان ناۋقاستارعا ەندى پەتروپاۆلدا دا مۇنداي مەديتسينالىق كومەك كورسەتىلەدى.