ب ۇ ۇ باس حاتشىسىنىڭ كومەكشىسى كيىز ءۇي تىگۋدى ۇيرەندى
ب ۇ ۇ باس حاتشىسى كومەكشىسىنىڭ بۇل ساپارى كەڭ اۋقىمدا ءوتتى. ول اۋىل ساياباعىنا اعاش وتىرعىزىپ، كيىز ءۇي تۇرعىزۋعا كومەكتەستى جانە اقساقالداردان باتا الدى.
سۇلتانوعلىنىڭ قازاق مادەنيەتىنە ءتانتى بولعانى سونشالىق، قولىنان ۇيالى تەلەفونىن تاستاماي، ەستەلىككە فوتوسۋرەت ءتۇسىرىپ ءجۇردى. سونداي-اق، ول «EXPO Camp» جاستار لاگەرىنە بارىپ، بالالارعا ساتتىلىك تىلەدى.
اتاپ وتكەن ءجون، استانادان 40 شاقىرىم جەردە ورنالاسقان «ارناساي» جاسىل تەحنولوگيالار ورتالىعى 2015-جىلى ەكسپو-2017 مەن قازاقستاننىڭ «جاسىل» ەكونوميكاعا ءوتۋى اياسىندا قۇرىلعان.
بۇل ورتالىق قازاقستاننىڭ تۇراقتى دامۋى ءۇشىن ەكولوگيالىق تازا تاجىريبەلەر مەن زاماناۋي تەحنولوگيالاردى ۇشتاستىرادى. ورتالىق ازياداعى قاراپايىم ەلدى مەكەن ارناسايعا ب ۇ ۇ دامۋ باعدارلاماسى جيناقتاعان الەمدىك وزىق تاجىريبە قولدانىلدى جانە بەيىمدەلدى.
ماسەلەن، ب ۇ ۇ دامۋ باعدارلاماسى اۋىلعا كۇن كوللەكتورلارىن ورناتۋ ارقىلى ەلەكتر قۋاتىن %48 عا ۇنەمدەۋگە جانە تامشىلاتىپ سۋارۋ مەن وزگە دە سۋدى ساقتاۋ تەحنولوگيالارىنىڭ ارقاسىندا سۋ جۇمساۋدى ەكى ەسەگە قىسقارتۋعا سەپتىگىن تيگىزدى.
سونىمەن بىرگە، ورتالىق ازيادا العاش رەت وسىمدىكتىڭ تەز وسۋىنە جانە جىل سايىنعى ونىمدىلىكتى ۇلعايتۋعا كومەكتەسەتىن فوتوساۋلە شاشاتىن ديودتارى بار جىلىجاي سالىندى. بۇل جاقىن جەردە ورنالاسقان مەكتەپ وقۋشىلارىنا جىل ون ەكى اي ارزان ءارى قۇنارلى ەلەمەنتتەرگە باي تۇسكى اس ىشۋىنە مۇمكىندىك بەرەدى جانە ەرەسەكتەردى «جاسىل» جۇمىسپەن قامتاماسىز ەتەدى.
جاسىل تەحنولوگيالاردى ەنگىزۋ جانە تاراتۋ بويىنشا كورسەتىلگەن كومەكتەن بولەك، ب ۇ ۇ دامۋ باعدارلاماسى ءالسىز توپتارعا «جاسىل» ماماندىقتاردى مەڭگەرتۋ ارقىلى ادامي دامۋدى دا ينۆەستيتسيالاپ جاتىر. سۇلتانوعلى قولونەرشىلەردىڭ كورمەسىنە قاتىسىپ جانە جەرگىلىكتى شەبەرلەرمەن كەزدەسىپ، اتقارىلعان جۇمىستاردى جوعارى باعالادى.
«ارناساي» جاسىل تەحنولوگيالار ورتالىعى جاڭا ءىلىمدى ۇيرەنگىسى، بولىسكىسى جانە تاراتقىسى كەلەتىندەردىڭ بارلىعىنا «جاسىل» پلافورما قۇراتىن تۇتاس يننوۆاتسيالار كلاستەرى بار بىرەگەي حاب»، - دەدى سۇلتانوعلى جۋرناليستەرگە بەرگەن سۇحباتىندا.
دجيحان سۇلتانوعلى ب ۇ ۇ باس حاتشىسىنىڭ كومەكشىسى، ب ۇ ۇ دامۋ باعدارلاماسى ۇيىمداستىرۋشىسىنىڭ كومەكشىسى، ەۋروپا جانە ت م د ەلدەرى بويىنشا وڭىرلىك بيۋرو ديرەكتورى.
اۆتور: ايجان سەرىكجان قىزى
