ەكسپو كورمەسىن ارالاعان كەزدە مىنالاردى ەستەن شىعارماڭىز

استانا. قازاقپارات - ەكسپو كورمەسى اشىلعالى بەرى كورۋشىلەردىڭ قاراسى كۇن ساناپ كوبەيىپ كەلەدى. جاقسىنى كورمەككە دەپ، كورمەدە ورنالاسقان پاۆيلونداردى تاماشالاۋعا باراتىن كورەرمەن حالىققا پايداسى تيەر دەگەن نيەتپەن تومەندەگى كەڭەستەردى ۇسىنىپ وتىرمىز.

ەكسپو- عا تاكسيمەن كەلسەڭىز دە، ءوز كولىگىڭىزبەن كەلسەڭىز دە «Mega Silk Way» و س و جاعىنان (قابانباي باتىر داڭعىلى جاعى) توقتاڭىز. ءوز كولىگىڭىزبەن كەلسەڭىز سول مەگا، ەكسپو- نىڭ اقىلى تۇراعىنا قوياسىز. ساعاتى 200 تەڭگە، ءار كەيىنگى ساعاتىنا 100 تەڭگە قوسىلا بەرەدى؛

ىڭعايلى اياق- كيىممەن كەلىڭىز. اسىرەسە، قىز- كەلىنشەكتەر بيىك وكشە دەگەندى ۇمىتىڭىز. ەكسپو كەشەنى ۇلكەن الاڭ. بيلەت قۇنىن وتەپ، ۋاقىتتى ءتيىمدى وتكىزەم دەسەڭىز، كوپ كورىپ، كوپ جۇرۋگە تۋرا كەلەدى. كەشەننىڭ اۋلاسىنا ەۋروپا كوشەلەرىندەگىدەي برۋسچاتكالار توسەلگەن. جاي تابان اياق- كيىمدى ءجون كورگەنىڭىز دۇرىس بولار؛

تاماقتانىپ شىعىڭىز. وزىڭىزبەن الىپ شىققان سۋدى كەشەنگە كىرگىزە مە، بىلمەيمىن. الايدا، الاڭداعى تىسكە باسار، سۋسىنداردىڭ باعاسى ادەتتەگىسىنەن قىمبات. تۋريستەردىڭ قالتاسىنا ارنالعان. ماسەلەن، 0,5 ل. تاسساي 450 تەڭگە؛

3-4 جاسار ءالى كوپ ەشنارسە تۇسىنبەيتىن بالالاردى ۇيگە تاستاپ كەتۋگە تىرىسىڭىز. سەبەبى، ولارعا عىلىم، مادەنيەت دەگەندەرىڭىز سونشالىقتى قىزىق ەمەس. ءوزى دە شارشايدى، ءسىزدى دە شارشاتادى. ەكسپو- عا كىرەبەرىس جاعىندا بالالارعا ارنالعان جالعا كولياسكالار بار. ساعاتى 500 تەڭگە. ءسىز كەمىندە كورمەدە 3-4 ساعات بولاسىز. قانشا تولەيتىندىگىڭىزدى ەسەپتەي بەرىڭىز؛

وزىڭىزبەن بىرگە جەكە ءتولقۇجاتىڭىزدى الا شىعىڭىز. كىرەردە ءتولقۇجات تالاپ ەتىلەدى دەگەن. بىزدەن تالاپ ەتپەدى. ءبىراق، ۆەلوسيپەد، كولياسكا جالعا الاتىن بولساڭىز، كەپىلگە قالدىراتىن قۇجاتىڭىز بولۋ كەرەك؛

ەكسپو پاۆيلوندارىنىڭ بارلىعىن كورۋگە تىرىسپاڭىز. بارلىعىن ءبىر كۇندە كورۋ اۋىرلاۋ بولادى. وزدەرىڭىز ءۇشىن قاي ەلدەر قىزىق بولار ەدى الدىن- الا جوسپارلاپ الىڭىز. ماسەلەن، مەن كورگەن پاۆيلونداردىڭ ىشىندە ازەربايجان، ۆەتنام، جاپونيا، يتاليا، اۆستريا، سلوۆاكيا، ءۇندىستان، پاكىستان پاۆيلوندارىن كورۋدى سەنىمدى تۇردە ۇسىنار ەدىم.

بارىنەن بۇرىن ءوزىمىزدىڭ قازاقستاننىڭ پاۆيلونىن كورۋدى ۇمىتپاڭىز. ءبىزدىڭ پاۆيلون شاردىڭ ىشىندە ورنالاسقان. ەكسپو دەمەۋشىلەرى، شاڭحاي ىنتىماقتاستىق وداعى، ۆەنەسۋەلا پاۆيلوندارىنا ۋاقىت شىعىنداپ قاجەتى جوق؛

الاڭدا نەمەسە پاۆيلوننىڭ ىشىندە بولىپ جاتقان ۇلتتىق ونەر، ءان- بي قويىلىمدارىن كورۋگە كەمىندە 10 مينۋت ءبولىڭىز. بۇل ۇلتتاردى كۇندە كورىپ جۇرگەن جوقسىز. سوندىقتان، ۇلتتىڭ كوڭىل- كۇيىن، رۋحىن سەزىنۋگە، تۇسىنۋگە تىرىسىڭىز.

ەكسپو- عا بيلەت قۇنى دەمالىس كۇندەرىنە 6000 تەڭگە، جۇمىس كۇندەرىنە 4000 تەڭگە، قىركۇيەككە دەيىن كەز كەلگەن كۇنگە 8000 تەڭگە، 12 جاسقا دەيىن بالالارعا 3000 تەڭگە، 5 جاسقا دەيىنگى بالالارعا تەگىن، ستۋدەنتتەرگە 50 پايىز ارزان.

بيلەت ءبىر كۇنگە جارامدى. ەكسپو الاڭىنان شىعىپ كەتسەڭىز، قايتىپ سول بيلەتپەن كىرە المايسىز. كورمە الاڭىنا 09.00 -22.30 ارالىعىندا كىرە الاسىز.

دينارا بولاتتىڭ پاراقشاسىنان الىندى