استاناداعى اۋەجايدىڭ جاڭا تەرمينالى العاشقى حالىقارالىق رەيستى قابىلدادى
بۇل كۇنى جاڭا تەرمينال Airbus- 320 ۇشاعىمەن ماسكەۋگە ۇشقان جولاۋشىلارعا قىزمەت كورسەتتى.
«استانا حالىقارالىق اۋەجايى» باسپا ءسوز قىزمەتىنىڭ حابارلاۋىنشا، سونداي- اق، حالىقارالىق باعدارلارعا تاشكەنتكە («وزبەك اۋەجولى») مەن فرانكفۋرتكە ۇشاقتار جىبەرۋ جوسپارلانىپ وتىر. «بارلىعى استانا اۋەجايىنىڭ جاڭا تەرمينالىنىڭ اشىلۋىن كۇتتى. مىنە، ەندى ءبىز حالىقارالىق اۋەجاي ارقىلى جولاۋشىلاردى كۇتىپ الىپ، شىعارىپ سالۋدى باستادىق»، - دەيدى استانا حالىقارالىق اۋەجايىنىڭ باسقارما ءتوراعاسى پاولو ريچيوتتي. پ. ريچيوتتيدىڭ ايتۋىنشا، «كوماندا قىسقا مەرزىمدە جوبانى تابىستى جۇزەگە اسىردى».
ونىڭ ايتۋىنشا، «استانا اۋەجايىن دامىتۋ جوباسى الەمنىڭ ءىرى قالالارىمەن جالعاستىراتىن باستى بايلانىس جەلىسى - ورتا ازيا ءوڭىرىنىڭ ايماقتىق حابى» بولىپ تابىلادى. اتاپ وتەرلىگى، استانا حالىقارالىق اۋەجايدىڭ جاڭا تەرمينالى مەملەكەت باسشىسىنىڭ قاتىسۋىمەن 31 - مامىردا اشىلدى. زامانۋي ۇلگىدەگى جولاۋشىلار تەرمينالىنىڭ قۇرىلىسى 2014 -جىلعى قاراشادا باستالىپ، 2017 -جىلى مامىردا اياقتالدى. جاڭا تەرمينالدىڭ اۋماعى 47 مىڭ شارشى مەتر، جىلىنا 8,2 ميلليون جولاۋشىنى وتكىزەدى. جاڭا تەرمينال ەسكى اۋەجايدىڭ وتكىزۋ قابىلەتىن 2,5 ەسەگە ارتتىردى.
