قىتايدا جابايى قاباندار قورا تولى قويدى جارىپ كەتتى
«جەرگىلىكتى شوپانداردىڭ ايتۋىنا قاراعاندا، ۇنەمى توپتاسىپ جۇرەتىن جابايى شوشقالار كوكتەم مەن قىستا قوراعا كىرىپ مالدى شىعىنداسا، جازدا تابيعي جايىلىمدى قازعىلاپ، شابىندىقتى ءبۇلدىرىپ كەتەتىن بولعان. وسىدان 2 جىل بۇرىن كۇنەس اۋدانىنىڭ تۇرعىنى ىسرايىل مەن اقىلبەكتىڭ قوراسىن سىندىرىپ كىرگەن جابايى قاباندار 30 قوزى مەن 6 ساۋلىق قويىن جارىپ كەتكەن. بۇل سەكىلدى وقيعالار سوڭعى كەزدە جيىلەمەسە ازايماي وتىر. ءتىپتى، نارات وڭىرىندە جابايى شوشقا ادام جاراقاتتاپ، كىسى جازىم بولعان جاعداي دا كەزدەسكەن. سوڭعى جىلدارى ۇكىمەتتىڭ جابايى حايۋاناتتاردى قورعاۋ تەبىنىن ارتتىرۋىنا بايلانىستى، ورماندى وڭىرلەردەگى قوڭىر اڭنىڭ سانى قاۋىرت كوبەيىپ، جايىلىم ەكولوگياسىنىڭ بۇلىنۋىنە ءوز اسەرىن تيگىزسە، قاسقىر، جابايى شوشقا سياقتى جىرتقىش اڭداردىڭ مال شارۋاشىلىعىنا تيگىزەتىن زيانى دا كۇن سايىن ارتىپ كەلەدى»، دەپ جازادى اتالمىش باسىلىم.
مەملەكەت جاعىنان قورعالاتىن حايۋاناتتار تۇرعىنداردىڭ مالىنا شاباتىن بولسا، ونىڭ شىعىنىن كىم وتەۋى كەرەك؟ گازەت وسى سۇراقتاردىڭ جاۋابىن ىزدەپ، زاڭ ماماندارىنىڭ كەڭەسىنە جۇگىنگەن. زاڭگەرلەر مەملەكەت جاعىنان قورعالاتىن ايۋ، قاسقىر، جابايى شوشقا تەكتەس جىرتقىش حايۋاناتتار تۇرعىنداردىڭ مالىن جەپ كەتسە نەمەسە تۇرلىشە دارەجەدە ەكونوميكالىق شىعىن اكەلسە، وندا وسىعان قاتىستى قىتاي زاڭدارىندا قاراستىرىلعان بەلگىلەمەلەر نەگىزىندە ءتيىستى مەملەكەتتىك مەكەمەلەرگە، كەلتىرىلگەن شىعىن تۋرالى ارىز جازۋعا قۇقىلى ەكەنىن ايتادى.
اۆتور: باقىتجول كاكەش
