ورتالىق ازيا وداعىن «تۇركىستان بەستىگى» دەپ اتاۋ ۇسىنىلدى

استانا. قازاقپارات - بۇگىن ورتالىق ازياداعى قاۋىپسىزدىك ماسەلەلەرىنە ارنالعان كونفەرەنتسيادا جاڭا ايماقتىق بىرلەستىكتى قۇرۋ ماسەلەسى قايتا كوتەرىلدى.

ال قازاق- نەمىس ۋنيۆەرسيتەتى جانىنداعى حالىقارالىق جانە ايماقتىق ىنتىماقتاستىق ينستيتۋتىنىڭ ديرەكتورى بولات سۇلتانوۆ ورتالىق ازيانىڭ جاڭا وداعىن «تۇركىستان بەستىگى» ەتىپ قۇرۋدى ۇسىندى، دەپ حابارلايدى قازاقپارات ءتىلشىسى.

ساراپشىنىڭ ايتۋىنشا، وسى سالادا ورتالىق جانە شىعىس ەۋروپا ەلدەرىنىڭ تاجىريبەسىن پايدالانۋعا ابدەن بولادى. ول جاقتا ۆەنگريا، پولشا، چەحيا مەن سلوۆاكيا ەۋروپالىق وداققا كىرەردىڭ الدىندا ءوز بىرلەستىگىن قۇرىپ، ورتاق ماسەلەلەردى بىرلەسىپ شەشۋدى ۇيعاردى. ال 2004 -جىلى وداققا مۇشە بولعاننان كەيىن تورتتىكتى ساقتاپ قالدى. سەبەبى ايماقتىق جانە حالىقارالىق ماسەلەدەردى شەشكەندە بىرلەسىپ جۇمىس جاساعان ءتيىمدى. ءتورت مەملەكەت ەۋروپالىق كەڭەستىڭ ءاربىر وتىرىسىنا دەيىن الدىمەن وزدەرى جينالىپ، ورتاق ۇستانىمدارىن ازىرلەيدى. مەملەكەت باسشىلارى دا، ساراپشىلارى دا ۇنەمى جينالىپ، بارلىق وزەكتى ماسەلەلەردى تالقىلاپ وتىرادى.

«ورتالىق ازيادا ءدال وسى تاجىريبەنى پايدالانۋعا بولادى. تۇركىستان قالاسى اتالعان ارىپتەستىكتىڭ ورتالىعى بولا الادى. ال ورتالىق ازيانىڭ ايماقتىق بىرلەستىگىن «تۇركىستان بەستىگى» دەپ اتاۋعا بولادى»، - دەيدى سۇلتانوۆ.

ايتا كەتەيىك، بۇگىن استانادا قازاقستاننىڭ ستراتەگيالىق زەرتتەۋلەر ينستيتۋتىنىڭ ۇيىمداستىرۋىمەن ورتالىق ازياداعى قاۋىپسىزدىك ماسەلەلەرىنە ارنالعان جىل سايىنعى كونفەرەنسيا باستالدى. بيىلعى كونفەرەنسيانىڭ تاقىرىبى - «جاھاندىق ترانسفورماتسيا جاعدايىنداعى ورتالىق ازيا». جيىنعا وزبەكستان، قىرعىزستان، قىتاي مەن رەسەيدىڭ ساراپشىلارى قاتىسۋدا. سول جەردە دەپۋتات ماۋلەن اشىمبايەۆ ورتالىق ازيادا جاڭا ايماقتىق بىرلەستىكتى قۇرۋ ماسەلەسىن قايتادان كوتەردى.

اۆتور: ارمان اسقاروۆ