ەلوردا ساياباقتارى «اقىلدى» شامدارمەن جارىقتاندىرىلدى
ەلوردا سيركىنىڭ اۋماعىندا دا ەنەرگيا ۇنەمدەيتىن Green Light جۇيەسى ورناتىلدى. «ولاردىڭ قۋاتتىلىعى 200 ۆاتت، ياعني، ءبىزدىڭ كادىمگى قولدانىستاعى شامداردان قۋاتتىلىعى ءسال عانا از، الايدا 12 ۆولتتان باستاپ جۇمىس ىستەيدى. سايكەسىنشە مۇنداي شامداردىڭ ەنەرگيانى تۇتىنۋ كولەمى وتە از. بۇل ءوز كەزەگىندە قۋات كوزىن ەداۋىر ۇنەمدەۋگە مۇمكىندىك بەرەدى» ، - دەپ ءتۇسىندىردى ەنەرگيا كوزدەرىن جاڭارتۋ جوباسىنىڭ باسشىسى رۋستام قادىروۆ.
مۇنداي شامشىراقتار قازاقستاندا جاسالعان، كوشە شامدارىنىڭ كەسكىنى ەلوردا سيركىنە ارنايى جاساپ، دايىندالعان. «شامنىڭ ديزاينى ءبىزدىڭ تاپسىرمامىز بويىنشا جاسالدى. ءبىزدىڭ سيرك بەيمالىم ۇشىپ جۇرگەن نىسان كەلبەتىندە، سول سەبەپتەن شامشىراقتار دا وسى كەسكىنگە ساي فۋتۋريستىك ۇلگىدە جاسالدى. ىشكى جانە سىرتقى جاقتارى، ديزاينى - بارلىعى قازاقستاندا جاسالىپ، قۇراستىرىلدى» ، - دەدى ر. قادىروۆ. جاقىن ۋاقىتتا Green Light جۇيەسى بويىنشا ەلوردانىڭ بارلىق ساياباقتارى جارىقتاندىرىلماق.
