ساعاديەۆ بالاباقشاعا كەزەككە تۇرۋ ءتارتىبىن ءتۇسىندىردى

استانا. قازاقپارات- ءۇش جىلدا قازاقسانداعى جەتكىنشەكتەر بالاباقشامەن تولىقتاي قامتىلادى. بۇل تۋرالى ەسەپتى كەزدەسۋدە ق ر ءبىلىم جانە عىلىم ءمينيسترى ەرلان ساعاديەۆ ءمالىم ەتتى، دەپ حابارلايدى قازاقپارات.

 «ءبىزدىڭ ماقسات - قالعان ءۇش جىلدىڭ ىشىندە 3-6 جاستاعى بالالاردى ءجۇز پايىزعا مەكتەپكە دەيىنگى بىلىممەن قامتۋ، ياعني ورەندەر مەكتەپكە كەلگەندە دايىن بولۋى كەرەك. بالاباقشالاردى اشۋ ءۇشىن مەملەكەتتىك- جەكەشە ارىپتەستىكتى دامىتۋعا ءمان بەرىلىپ وتىر. بۇل باعىتتا جاقسى ناتيجەلەر بار. بىلتىر 800-دەن استام جاڭا بالاباقشا، شاعىن ورتالىقتار اشىلدى، سونىڭ 80 پايىزى جەكەمەنشىك ۇيىمدار. وسىنىڭ ارقاسىندا 3-6 جاستاعى بالالاردى بالاباقشامەن قامتۋ ءتورت پايىزعا ءوسىپ، 85 پايىزعا جەتتى. قالعان 15 پايىزىن ءۇش جىلدىڭ ىشىندە قامتۋ كەرەك»، - دەدى مينيستر.

 ونىڭ سوزىنە قاراعاندا، بۇل باعىتتا ءبىرىنشى كەزەكتە جەكەمەنشىك بالاباقشالاردىڭ سۇراۋى بويىنشا جاڭا سانيتارلىق نورمالاردى قابىلداۋ كوزدەلىپ وتىر. بۇل نورمالار ازىرلەنىپ، ءۇش اي بويى تالقىلاندى.

«مىڭداعان مامان ءوز پىكىرلەرىن ءبىلدىردى. ەندى ارى قاراي بالاباقشالاردىڭ ورىندارى ارتا تۇسەدى دەگەن سەنىمدەمىز. ەكىنشىدەن، بالاباقشا كەزەگى ماسەلەسىن رەتكە كەلتىرۋ قاجەت. بۇگىندە بىزدە بارلىعى ەلەكتروندى تۇردە كەزەككە تۇرادى، الايدا بالاباقشالارعا ورىنداردى ۇلەستىرۋ قولما- قول رەجىمدە ىسكە اسىرىلۋدا. بۇل ءتارتىپ ءار وبلىستا وزىنشە جۇرگىزىلەدى. سوندىقتان ءبىز بۇل كەزەكتەردىڭ بارلىعىن «ازاماتتارعا ارنالعان ۇكىمەتتە» بىرىكتىرىپ، اۆتوماتتاندىرۋ شەشىمىن جاسادىق. ياعني، اتا- انالار تىركەۋگە تۇرادى، سودان كەيىن مەملەكەتتىك نەمەسە جەكەمەنشىك بالاباقشاعا جولداما الادى. ەگەر دە ۇناسا، سوندا قالادى جانە كەزەكتەن شىعادى، وسى ورايدا ولاردىڭ سوڭىنان «بالاپان» قارجىسى اۆتوماتتى تۇردە اۋدارىلادى»، - دەپ ءتۇسىندىردى ساعاديەۆ.

 اۆتور: رۋسلان عابباسوۆ