الاش قايراتكەرلەرىن ءبىر-بىرىنە قارسى قويۋدى توقتاتۋ كەرەك - دارحان قىدىرالى

استانا. قازاقپارات - الاش قايراتكەرلەرىن ءبىر-بىرىنە قارسى قويۋدى توقتاتۋ كەرەك. مۇنداي پىكىردى بۇگىن Sarap Time ساراپشىلار كلۋبىنىڭ «تاريحي سانا جانە قوعامنىڭ رۋحاني قاۋىپسىزدىگى» تاقىرىبىنداعى وتىرىسىندا حالىقارالىق تۇركى اكادەمياسىنىڭ پرەزيدەنتى دارحان قىدىرالى ءبىلدىردى، دەپ حابارلايدى قازاقپارات.

«بىزگە 1930-جىلدارداعى ماتەريالداردى سول قالپىندا باعالاۋعا بولمايدى. ماسەلەن، ءبىر حاتتاردى الا سالىپ، بۇلار ءبىر-ءبىرىن ساتتى، ءبىر-ءبىرىنىڭ ۇستىنەن ارىز جازدى دەپ ايتۋ سول كەزەڭدى بىلمەۋدەن تۋعان نارسە. كەيدە ءبىر-ءبىرىن قورعاۋ ءۇشىن جازدى، ارالارىنا جانسىز وتىرعىزدى. كەيدە كۇشتەپ قول قويدىردى. ءتىپتى، الدارىنا بالالارىن اكەپ قيناۋ ارقىلى دا قول قويدىرىپ الدى. بۇل بۇكىل وتباسىنا تۇسكەن قاسىرەت ەدى. كارلاگ، الجيردە ايەلدەرىنىڭ دە، بالالارىنىڭ دا قانشالىقتى ازاپقا تۇسكەنىن بىلەمىز. سوندىقتان الاش قايراتكەرلەرىن ءبىر-بىرىنە قارسى قويۋدى توقتاتۋ كەرەك دەپ ويلايمىن»، - دەدى ول.

ونىڭ ايتۋىنشا، 1930-جىلداردا جاريالانعان ماتەريالداردى كورۋ، جاريالاۋ ءبىر باسقا. ال ولاردى ساراپتاما جاساۋ، تالداۋ تاريحشىلاردىڭ ەنشىسىندەگى ماسەلە. «سوندىقتان ءبىز ۇلت بولۋ جولىندا بۇل كەزەڭنەن تاعىلىم الا وتىرىپ، رۋحاني جاڭعىرۋدا ۇلكەن قادام جاساۋىمىز قاجەت»، - دەدى دارحان قىدىرالى.

 اۆتور: مارلان جيەمباي