امەريكالىق ساراپشى قانات يسلامعا كيركلەندپەن كەزدەسۋدىڭ نە ءۇشىن كەرەگى جوق ەكەنىن ءتۇسىندىرىپ بەردى
امەريكالىق بوكس ساراپشىسى دجو ماك Vesti.kz پورتالىنىڭ تىلشىسىنە ءبىرىنشى ورتا سالماقتاعى WBO NABO جانە WBA Inter- Continental تۇجىرىمدارى بويىنشا الەمنىڭ جاڭا چەمپيونى قانات «QAZAQ» يسلامعا (24-0, 19 ك و) امەريكالىق بوكسشى دجەيمس كيركلەندپەن كەزدەسۋدىڭ نە ءۇشىن كەرەگى جوق ەكەنىن ءتۇسىندىرىپ بەردى.
«قانات يسلامعا بۇل كەزدەسۋدىڭ كەرەگى جوق. كيركلەندتىڭ بۇعان دەيىن دە جانكۇيەرلەرى كوپ ەمەس ەدى. ونىڭ سوڭعى كەزدەسۋىن وتكىزگەن ۋاقىتتان بەرى ەكى جىل ءوتتى. سوندىقتان قازىر ول ا ق ش جەرىندە دە سۇرانىسقا يە بوكسشىلاردىڭ قاتارىنان ەمەس. كيركلەندكە قارسى كەزدەسۋ قانات يسلام ءۇشىن كەرەك ەمەس. ول تەك ۋاقىت جوعالتادى. ال يسلامنىڭ ۋاقىتى قازىرگى ۋاقىتتا از قالدى. سوندىقتان باسقا قارسىلاس ىزدەگەنى دۇرىس بولار. ءتىپتى سالماق اۋىستىرىپ كورسە دە بولادى. ول مىقتى بوكسشى. سوندىقتان مىقتى قارسىلاس تاڭداۋى كەرەك دەيدى»، - دەيدى دجو ماك.
ال بۇعان دەيىن رەسەيلىك كاسىپقوي بوكسشى سەرگەي كوۆالەۆتىڭ بۇرىنعى باپكەرى بولعان دەرەك سانتوس- روسساريو كيركلەندپەن جەكپە-جەك قانات يسلام ءۇشىن ا ق ش جەرىندە جاڭا مۇمكىندىكتەردى اشاتىنىن مالىمدەگەن ەدى.
ەسكە سالايىق، قانات يسلام ءوزىنىڭ سوڭعى كەزدەسۋىن 26- مامىر كۇنى مەكسيكالىق نوربەرتو گونسالەسكە قارسى وتكىزىپ، 12 راۋندتىڭ قورىتىندىسى بويىنشا تورەشىلەردىڭ شەشىمىمەن جەڭىسكە جەتتى. ءسويتىپ ورتا سالماقتاعى WBO NABO جانە WBA Inter- ontinental تۇجىرىمى بويىنشا چەمپيوندىق بەلبەۋلەرىن جەڭىپ الدى. قازىرگى ۋاقىتتا وتانداسىمىزدىڭ ەنشىسىندە 24 كەزدەسۋ بار جانە بوكسشىمىز ونىڭ بارلىعىندا جەڭىسكە جەتكەن. 19 كەزدەسۋدە ول قارسىلاستارىن نوكاۋتقا جىبەرگەن.
بۇل جەڭىسىنەن كەيىن يسلام BoxRec پورتالىنىڭ رەيتينگىندە ءبىرىنشى ورتا سالماقتاعى بوكسشىلاردىڭ اراسىندا 27 ساتىعا جوعارىلاپ، 26- ورىنعا جايعاستى.
قانات يسلامنىڭ سوڭعى كەزدەسۋىنەن كەيىن قازاقستاندىق بوكسشى مەن كيركلەندىڭ كومانداسى جەكپە-جەك وتكىزۋ ءۇشىن كەلىسسوز جۇرگىزىپ جاتىر دەگەن مالىمەت شىققان بولاتىن. بۇل كەزدەسۋ 9- قىركۇيەك كۇنى ەلوردامىز استانا قالاسىندا ءوتۋى ىقتيمال. امەريكالىق بوكسشى بۇل كەزدەسۋ ءۇشىن قازاقستانعا كەلۋگە دايىن ەكەنىن دە ايتتى.
