قازان قالاسىنىڭ كورنەكتى جەرلەرى - فوتو

قازان. قازاقپارات - قازان - ساۋلەتىنىڭ زاماناۋي كوركەمدىگىمەن جانە مىڭجىلدىق تاريحىمەن تاڭعالدىراتىن كونە قالا.

وسى تاڭعاجايىپ قالامەن بايلانىستىرىلاتىن العاشقى قاۋىمداستىقتاردىڭ بارلىعى تاتارستان استاناسىنىڭ ەڭ كورنەكتى جەرى - قازان كرەملىمەن ساباقتاسىپ جاتاتىنى ءسوزسىز.

ۆولگانىڭ سول جاعالاۋىندا ورنالاسقان كرەملدىڭ تەرريتورياسى 1500 شارشى مەتردى قامتىپ، وندا بىرنەشە تاريحي جانە ارحيتەكتۋرالىق كەشەندەر ورنالاستىرىلعان.

تاتارستاننىڭ باس مەشىتى - قۇل شاريف مەشىتى قازان كرەملىنىڭ اۋماعىندا ورنالاسقان. مەشىت 1552-جىلى يۆان گروزنىيدىڭ اسكەرى بۇزعان ەسكى قازان حاندىعى مەشىتىنىڭ ورنىنا سالىندى.

ونىڭ قۇرىلىسى 1996-جىلدان 2005-جىلعا دەيىن جالعاستى. مەشىت بۇزىلعان عيباداتحانانىڭ سوڭعى يمامىنىڭ ەسىمىمەن اتالادى.

58 مەترلىك 4 ۇلكەن جانە 4 كىشكەنتاي مۇنارالارى بار.

قازان كرەملىنىڭ تاعى ءبىر كورنەكتى جەرى - سۇيىمبيكە مۇناراسى.

مۇنارا تاريحىن جەرگىلىكتى تۇرعىندار 1552-جىلى يۆان گروزنىيدىڭ بۇيرىعى بويىنشا جەتى كۇندە سالىنىپ بىتكەن مۇنارا جايلى اڭىز اڭگىمەمەن بايلانىستىرادى.

مەشىت قۇرىلىسىنا ءوزىن ايەلدىككە الماقشى بولعان سۇيىمبيكە پاتشايىمنىڭ يۆان گروزنىيعا قويعان شارتى سەبەپ بولعان.

الايدا، ونىڭ ايەلى بولعىسى كەلمەگەن سۇيىمبيكە مەشىتتىڭ قۇرىلىسى اياقتالعاننان كەيىن مۇناراعا كوتەرىلىپ، تومەن قاراي قۇلاپ مەرت بولعان.

قازانعا كەلگەن قوناقتارعا سۇيىمبيكە تاعدىرى ەرلىكتىڭ، ەلدىكتىڭ بەلگىسى رەتىندە ايتىلادى. سۇيىمبيكە مۇناراسىنىڭ بوكتەرىندە 1977-جىلى تابىلعان قازان حاندارىنىڭ كەسەنەسى ورنالاسقان.

كەسەنە 1460-جىلدارى سالىنعان. بۇل جەردە ماحمۋد حان دا جەرلەنگەن. 2004-جىلى كەسەنەدە تاعى بىرنەشە ادامنىڭ جەرلەنگەندىگى انىقتالدى.

ولار يبراگيم، حاليل، جاڭگىر نەمەسە سافا-گيرەي حاندار بولۋى مۇمكىن دەگەن بولجام بار.

ءبىراز شالعاي جەردە 16 عاسىرعا تيەسىلى، كوك ءتۇستى جانە التىن جالاتىلعان كۇمبەزدى بلاگوۆەشەنسكي سوبورى ورنالاسقان. عيباداتحانا 1925-جىلى جابىلىپ، 2005-جىلدان باستاپ قانا قايتادان اشىلدى.

ونىڭ جانىندا قازاننىڭ ەجەلگى ساۋلەتشىلەرىنە ارنالعان ەسكەرتكىش ورناتىلعان. قالا ىشىندەگى قازىرگى زامانعى ۇيلەر مەن شۋلى كوشەلەردىڭ اراسىنداعى تاتار اۋىلى دەپ اتالاتىن تاريحي اۋماققا ەنۋ جانىڭا ەرەكشە جايلىلىق سىيلايدى.

بۇل ايماق تاريحي ەسكەرتكىشتەرگە تولى: مەشىتتەر مەن مەدرەسەلەر، كونە بازار الاڭى مەن قازان اقسۇيەكتەرىنىڭ ۇيلەرى. ءال-مارجان مەشىتى - باستاپقىدا ءبىرىنشى سوبور، كەيىننەن ەفەندي (گوسپودسكوي)، يۋنۋسوۆ (كوپەس يۋنۋسوۆتارتىڭ فاميلياسى بويىنشا) دەپ اتالىپ، بەرتىن كەلە 19- عاسىردىڭ ەكىنشى جارتىسىندا وسى مەشىتتە قىزمەت ەتكەن شيگابۋتدين مارجاني يمامنىڭ قۇرمەتىنە ءال-مارجان مەشىتى دەپ اتالدى.

2013-جىلى ۇلكەن قازان تۇرىندە سالىنعان ەرەكشە نەكە سارايى - «قازان» وتباسى ءۇيى دەگەن اتاۋعا يە بولدى.

بۇل دا قازان قالاسىنداعى ەڭ كورنەكتى عيماراتتاردىڭ قاتارىندا. تاتارستان استاناسىنىڭ زامان تالابىنا ساي كورنەكىلىكتەرىنىڭ تاعى ءبىرى - 2010-جىلى سالىنعان ەگىنشىلەر سارايى، مۇندا تاتارستان رەسپۋبليكاسىنىڭ اۋىل شارۋاشىلىعى مينيسترلىگى ورنالاسقان.

فرانسۋزدىق باروككو مەن يتاليالىق رەنەسسانس ۇلگىلەرى ۇيلەستىرىلگەن بۇل ساراي شىن مانىسىندە ەۋروپا سارايلارىن ەسكە سالادى.

ءوزىنىڭ كوپ قىرلى تاريحىمەن، تابيعاتى كوركەم جاعاجايلارى، جاسىل ساياباقتارى، زاماناۋي ساۋلەتى جانە تاريحي ەسكەرتكىشتەرى جاراسقان قازان قالاسىنىڭ رەسەيدىڭ ءۇشىنشى استاناسى اتانۋى بەكەر بولماسا كەرەك.