قارجى پيراميدالارىنا قاتىستى ىشكى ىستەر مينيسترلىگى دە دابىل قاقتى
«ەلىمىزدە قارجى پيراميداسىنىڭ بەلگىلەرى بار ۇيىمداردىڭ قىزمەتى ءورشىپ تۇر. 2016 -جىلى قارجى پيراميداسىن قۇرۋ جانە باسقارۋ فاكتىسى بويىنشا 350 قىلمىستىق ءىس وندىرىستە بولسا، اعىمداعى جىلدىڭ 4 ايىندا عانا ولاردىڭ سانى 351 گە جەتىپ ۇلگەردى. الاياقتاردىڭ كەسىرىنەن ونمىڭداعان قازاقستاندىق زارداپ شەكتى. مىسالى، قىزىلوردا وبلىسىندا Questra Holdings Inc. اتتى شەتەلدىك كومپانيانىڭ قىلمىستىق ارەكەتتەرى اشكەرە بولدى. ول كومپانيا سالىمشىلارمەن 30 مىڭ تەڭگە سالىنعان جاعدايدا جارتى جىلدا 40 مىڭ تەڭگە قايتارىلادى دەگەن جەلەۋمەن كەلىسىمشارتتار قۇراستىرعان» ، - دەلىنگەن مينيسترلىكتىڭ تاراتقان حابارلاماسىندا.
ونىڭ الدىندا استانادا وسىعان ۇقساس قىلمىستىق توپتىڭ الاياقتىق قىزمەتىنە توسقاۋىل قويىلعان بولاتىن. «رەسپەكت» كومپانياسىنىڭ قۇرىلتايشىسى يبرايەۆ ونىڭ يەلىگىندەگى فيرما بريتانيانىڭ ەڭ ءىرى «BANK OF KINGDOM» اتتى بانكىمەن 1000 ەۋروعا دەيىن كەپىلدىكسىز ءارى تومەن پايىزدى نەسيە بەرۋ تۋرالى كەلىسىم جاساسقانىن ايتىپ، جالعان پرەزەنتاتسيالار وتكىزىپ كەلگەن. ول وعان كەلگەن قاراپايىم ازاماتتارمەن نەسيە شارتىن جاساسىپ، ءار ادامنان 75 مىڭ تەڭگەدەن 7 ميلليون تەڭگەگە دەيىنگى سومادا الدىن الا جارنا العان، كەيىن ءىزىن دە سۋىتقان. الدانعان ازاماتتاردىڭ سانى مىڭنان اسىپ جىعىلدى. قىلمىستىق ءىستى تەرگەۋ ناتيجەلەرى بويىنشا يبرايەۆ 9 -جىلعا باس بوستاندىعىنان ايىرىلدى.
«ازاماتتارعا قىراعىلىق تانىتۋدى، از ۋاقىتتا قىرۋار پايدا اكەلەمىز دەپ ۋادە ەتەتىن ۇيىمدارعا اقشا سالۋعا اسىقپاۋعا شاقىرامىز» ، - دەلىنگەن ءى ءى م- ءنىڭ حابارلاماسىندا.
اۆتور: جاسۇلان جولدىبايەۆ
