قازاقستان ءۇشىن قىتايدىڭ ازىق- تۇلىك نارىعىنا شىعۋ قيىنداپ وتىر

استانا. قازاقپارات - قىتاي حالىق رەسپۋبليكاسى ۇسىنعان «ءبىر بەلدەۋ - ءبىر جول» اتتى باستاما قازاقستاننىڭ «نۇرلى جول» باعدارلاماسىمەن جاقسى ۇندەسىپ كەتتى.

وسىنىڭ ارقاسىندا ورتاق جوبالار قولعا الىنىپ، ەكى ەل اراسىنداعى ساۋدا-ساتتىق كۇشەيە ءتۇستى، دەپ حابارلايدى قازاقپارات ءتىلشىسى.

قازاق- قىتاي ىنتىماقتاستىعى جونىندەگى "China Center" حالىقارالىق ورتالىعىنىڭ باس ديرەكتورى ءادىل كاۋكەنوۆتىڭ ايتۋىنشا، «ءبىر بەلدەۋ - ءبىر جول» باستاماسى مەن «نۇرلى جول» باعدارلاماسى ۇندەسىپ تۇرعاننان كەيىن ورتاق جوبالاردىڭ ماڭىزدىلىعى ارتىپ وتىر. «بىلايشا ايتقاندا، ورتاق جۇمىستىڭ يدەولوگيالىق ءبىر ءمان پايدا بولدى. جۇمىس تا جاقسى ءجۇرىپ كەتتى. ءبىراز ماسەلەلەردى ورتاق مۇددە تۇرعىسىنان شەشۋگە مۇمكىندىك تۋدى. ماسەلەن، استاناداعى LRT جوباسىنىڭ ءوزى ەكىجاقتى ىنتىماقتاستىقتىڭ ءبىر كورىنىسىنە اينالدى. اتالعان جوبانىڭ قۇرىلىسىنا قىتايلىق كومپانيا اتسالىسىپ جاتىر. قىتايدا مونورەلسپەن جۇرەتىن ونداي قوعامدىق كولىكتەر كوپ. وسى سالاداعى ۇلكەن تاجىريبە قولعا الىنىپ وتىر»، - دەيدى كاۋكەنوۆ.

ال ءىرى جوبالاردىڭ ىشىندە ليانيۋنگان پورتىنداعى قازاقستاندىق تەرمينال، «قورعاس» حالىقارالىق ورتالىعى جانە تاعى باسقا جوبالار بار. «بۇرىن ءبىز تاۋار الۋ ءۇشىن قىرعىزدىڭ «دوردويىنا» كوپ بارساق، بۇگىندە، اسىرەسە، وڭتۇستىك وڭىرلەر ءۇشىن «قورعاس» حالىقارالىق ورتالىعىنا بارعان ءتيىمدى. دەگەنمەن، قازاقستان ءۇشىن ءالى كۇنگە دەيىن قىتايدىڭ ازىق- تۇلىك نارىعىنا شىعۋ قيىن بولىپ وتىر. ماسەلەن، استىققا شەكتەۋ بار. قازاقستانعا بەرىلەتىن كۆوتالار از. وتاندىق تاۋار وندىرۋشىلەرى بولسا، كۆوتالاردىڭ مۇلدەم بولماعانىن قالايدى. ەندى، ءقازىر ەت بويىنشا توسقاۋىلدار ءبىرشاما ازايىپ كەلەدى»، - دەپ اتاپ كورسەتتى كاۋكەنوۆ بۇگىن استانادا وتكەن «قازاقستان - رەسەي» ساراپشىلار فورۋمىندا.

ايتا كەتەيىك، سەسسيا كەزىندە ءادىل كاۋكەنوۆ ۇلى جىبەك جولى جوباسىنا قاتىستى ءبىرقاتار ماڭىزدى ماسەلەلەردى دە كوتەردى.

ال ق ر تۇڭعىش پرەزيدەنتىنىڭ قورى جانىنداعى الەمدىك ەكونوميكا مەن ساياسات ينستيتۋتىنىڭ مامانى اسقار نۇرشا قازاقستان مەن رەسەي اراسىنداعى ساۋدا- ساتتىقتىڭ تەپە- تەڭسىزدىگىنە توقتالدى. سونداي-اق اسقار نۇرشا ق ر پرەزيدەنتى نۇرسۇلتان نازاربايەۆ «بولاشاققا باعدار: رۋحاني جاڭعىرۋ» ماقالاسى ارقىلى رەسەي فەدەراتسياسىنا كەڭەس بەرگەنىن دە جەتكىزدى. قازاقستان - رەسەي ساراپشىلار فورۋمى قازاقستاننىڭ حالىقارالىق قاتىناستار كەڭەسى، "ۆالداي" پىكىرتالاس كلۋبى مەن "پاراسات" جۇيەلى زەرتتەۋلەر ينستيتۋتىنىڭ باستاماسىمەن ءوتتى.