ادامدار جەرلەۋ ءراسىمىن عارىشتا وتكىزبەك
بۇل تۋرالى عارىشتا ەرەكشە جەرلەۋ قىزمەت ءتۇرىن كورسەتەتىن Elysium Space كومپانياسى حابارلادى.
قايتىس بولعان ادامنىڭ وتباسى 2490 دوللارعا شاعىن جەر سەرىگىندە سىيىمدىلىعى 1 ليترگە دەيىنگى جانە سالماعى 1,33 كەلىدەن اسپايتىن 300 جاشىكتىڭ بىرىنەن ورىندى برونداي الادى. كەيىنىرەك Falcon 9 اتالمىش شاعىن جەرسەرىكتى وربيتاعا جەتكىزەدى جانە ول ەكى جىل بويى جەردى اينالىپ جۇرەدى. مارقۇمنىڭ تۋىستارى تابىتتىڭ ۇشۋ باعىتىن سمارتفونداعى ارنايى قوسىمشا ارقىلى ناقتى ۋاقىت بويىنشا باقىلاي الادى. جەرسەرىك ءوزىنىڭ تاپسىرماسىنىڭ سوڭىندا تومەندەپ، اتموسفەراعا كىرەدى جانە ادەمى بولىپ جانىپ كەتەدى.
جەرسەرىكتە ازىرگە 100 ورىن بروندالعان. ونىڭ تۇتىنۋشىلارى ميللياردەرلەر ەمەس، ءتۇرلى سوعىس ارداگەرلەرى، عارىش ىنتاگەرلەرى جانە ت. ب. Elysium Space بولاشاقتا 9950 دوللارعا ءمايىتتىڭ ءبىر شىمشىم توپىراعىن ايعا الىپ بارۋدى جوسپارلاۋدا.
NASA ەڭ العاشقى عارىشتا جەرلەۋ ءراسىمىن 1992 -جىلى وتكىزگەن بولاتىن. 1997 -جىلى كرەماتسيالانعان 24 ادامنىڭ كۇلى پەگاس زىمىرانى ارقىلى اسپانعا ۇشىرىلعان ەدى. ولار اسپاندا 2002 -جىلعا دەيىن ءجۇرىپ، اتموسفەراعا قايتا كىرەتىن كەزدە جانىپ كەتكەن بولاتىن.
