مۇنارادان سەكىرىپ كەتكەن جۇبايلاردى كەلىسسوز جۇرگىزۋشىلەر نەگە قۇتقارا المادى؟

استانا. قازاقپارات - ەلدىڭ ۇرەيىن تۋعىزعان وقيعادان كەيىن قازاقستاندىقتاردىڭ كوكەيىندەگى ساۋالعا جاۋاپ تابىلماي وتىر.

مۇنارادان سەكىرىپ كەتكەن جۇبايلاردى كەلىسسوز جۇرگىزۋشىلەرى نەشە قۇتقارىپ قالا المادى؟ بۇل سۇراققا ماماندار نەگە جاۋاپ بەرە المادى؟ ماماندار كەلىسسوز جۇرگىزۋشىلەر دۇرىس ەمەس ءتاسىلدى تاڭداعان دەپ وتىر.

بۇل تۋرالى 31 -ارنا حابارلادى.

سۋيتسيد جاساعان جۇبايلارمەن كەلىسسوز جۇرگىزگەن پوليتسەيلەردى جەرگىلىكتى جۋرناليستەر ۆيدەوعا ءتۇسىرىپ العان. ۆلاديمير شۋستەر مەن اسەل دۇيسەنبايەۆا سەكىرىپ كەتەتىندەرىن ايتىپ قورقىتقان. ولاردىڭ ماڭىنا پوليتسەيلەر مەن كەزدەيسوق ءوتىپ بارا جاتقان ادامدار جينالىپ قالعان. ۆيدەودان ۆلاديمير مەن اسەلدىڭ ۇرىسىن جانە ولاردى رايىنان قايتارۋعا تىرىسىپ باققان پوليتسەيلەردىڭ داۋسىن ەستۋگە بولادى. الايدا ەكى ساعاتقا سوزىلعان كەلىسسوز جۇمىستارى ناتيجە بەرمەدى. ەرلى-زايىپتىلار ءوز وزدەرىنە قول جۇمساپ، باقيلىققا اتتانىپ كەتە باردى.

«ادامداردىڭ ايتۋىنشا، تومەنگى جاققا تورقاپشىق قويىلعان، الايدا وتباسىلىق جۇپ باسقا جاعىنان سەكىرىپ كەتكەن. مەن دە كوردىم، ول كەزدە الىستان باقىلاپ تۇر ەدىم»، - دەيدى قۇرايلى اۋىلىنىڭ تۇرعىنى ابيبوللا كوزەيەۆ.

ۇلتتىق قاۋىپسىزدىك كوميتەتىنىڭ وتستاۆكاداعى پولكوۆنيگى ارات نارمانبەتوۆتىڭ ايتۋىنشا، مۇنداي كەلىسسوزدەردىڭ ءساتتى اياقتالۋىنا ەشكىم كەپىلدىك بەرە المايدى. بولماشى اعاتتىقتىڭ ءوزى ادام ولىمىنە اپارىپ سوقتىرۋى مۇمكىن. جاعدايدى باقىلاۋىنان شىعارىپ الماۋى ءۇشىن كەلىسسوز جۇرگىزۋشى مىقتى پسيحولوگ بولا ءبىلۋى ءتيىس.

«مۇنداي كەزدە ءبىر توپ ادامدار جينالىپ قالماۋى كەرەك. ولار ونسىز دا پسيحولوگيالىق كۇيزەلىسكە شالدىققان ادامدار. ءبىر، ءارى كەتسە ەكى ادام كەلىسسوز جۇرگىزۋى كەرەك. وتە سابىرلى كۇيدە»، - دەيدى ارات نارمانبەتوۆ.

پسيحوتەراپەۆت جىبەك جولداسوۆانىڭ ايتۋىنشا، ءوز وزىنە قول سالۋ ءۇشىن ادام ايلاپ، ءتىپتى جىلداپ ويلانادى. ەگەر ول بىردەن سۋيتسيدكە بارماسا، دەمەك ول ىشتەي ءوزىن بىرەۋدىڭ قۇتقارىپ الاتىنىنا سەنەدى. ال قاتتى تورىعىپ نەمەسە الكوگول جانە باسقا دا پرەپاراتتار قابىلداعان ادام عانا اياق استىنان ءوز- ءوزىن ءولتىرۋى مۇمكىن.

«ولار وسى ەكى ساعات ىشىندە بىرەۋدىڭ كومەگىنەن ۇمىتتەندى. مۇنداي كەزدە ادامعا ونىڭ قاجەتتىلىگىن كورسەتۋ قاجەت. ونىڭ باسقالارعا كەرەك ەكەنىن، بۇل تىعىرىقتان دا شىعۋعا بولاتىنىن ءتۇسىندىرىپ، قولداۋ كورسەتۋ كەرەك»، - دەيدى جىبەك جولداسوۆا.

اقتوبە پوليتسياسى ادام ولىمىمەن اياقتالعان وقيعاعا قاتىستى پىكىر بىلدىرمەدى. تەك ەكى ادامنىڭ ءولىمى فاكتىسىمەن «ءوز وزىنە قول جۇمساۋعا دەيىن جەتكىزۋ» بابى بويىنشا سوتقا دەيىنگى تەرگەۋ امالدارىنىڭ باستالعانى بەلگىلى. تەرگەۋ ناتيجەلەرى كەيىنىرەك بەلگىلى بولادى.

ال بۇل قايعىلى وقيعا ەلىمىزدە كاسىبي كەلىسسوز جۇرگىزۋشىلەردىڭ تاپشىلىعىن تاعى دا ءبىر رەت كورسەتتى. اسىرەسە، جاسوسپىرىمدەر ءجيى سۋيتسيد جاسايتىن بولعان. ونداي ساتتەردە ادامدى تىعىرىقتان الىپ شىعاتىن ماماننىڭ كومەگى ماڭىزدى.