الماتى وبلىسىندا مال مەن قۇستىڭ قانىن سورىپ كەتەتىن قۇبىجىق پايدا بولدى

استانا. قازاقپارات  - الماتى وبلىسىندا ءۇي قۇستارى مەن ۇساق مالدارعا قىرعيداي تيگەن قۇبىجىق پايدا بولدى.

 تۇرعىنداردىڭ ايتۋىنشا، ول قوي مەن ەشكىنى تاماقتاپ، تاۋىقتاردىڭ قانىن سورىپ كەتەدى ەكەن. مىڭبايەۆ اۋىلىنىڭ قورا- قوپسىسىن ىلاڭداپ جۇرگەن قاڭعىباس يتتەر بولۋى مۇمكىن. ارىز- شاعىم كوبەيگەن سوڭ جەرگىلىكتى اكىمدىك بۇرالقى يتتەردىڭ كوزىن جويۋعا كىرىسىپتى. ءبىراق ءۇي جانۋارلارىنا شابۋىل تيىلار ەمەس. بۇل تۋرالى ك ت ك تەلەارناسى حابارلادى.

مىڭبايەۆ تۇرعىندارىنان مازا كەتكەلى ءۇش اي. جۇمىرتقاسىن ساتىپ، ەتىن ازىق قىلىپ وتىرعان ءۇي قۇستارىنىڭ ولەكسەسىن جيناۋدان شارشادىق دەيدى ولار. بەلگىسىز حايۋاندار قاز- ۇيرەكتى تاماقتاپ، قانىن سورىپ كەتەدى ەكەن.

ال توقتار اپايدىڭ تاۋىعىمەن قوسا ساۋىپ وتىرعان ەشكىلەرىن دە ءولتىرىپ كەتكەن. بۇل جولى دا جىرتقىش جەمتىگىنىڭ تەك قانىن سورىپ، دەنەسىنە تيىسپەپتى.

" ءۇش لاعى تىعىلىپ قالىپتى. ءجاي ەشكى ەمەس، ساۋىن ەشكىلەر» دەيدى توقتار اپاي.

 تۇرعىندار بۇل قاڭعىباس يتتەر بولۋى مۇمكىن دەيدى. ءبىراق، تۇرلەرى ەرەكشە كورىنەدى. ايتۋىلارىنشا، كوزدەرى قىزىل، تۇمسىقتارى ۇشكىر. ولار جاقىنداعاندا وزگە يتتەر ۇرمەك تۇگىلى قىڭسىلداپ، ۇيشىكتەرىنەن شىقپاي قويادى ەكەن.

 «وسى يتتەردى ۇستاپ الىپ كەتسە بىزگە تىنىش بولار ەدى. بالالارعا شاپسا نە ىستەيمىز؟ » دەيدى اۋىل تۇرعىنى گۇلنار تارىبايەۆا.

شوشىنعان حالىققا شەنەۋنىكتەر ۋچاسكەلىك پوليتسەي مەن مال دارىگەرىنە بارىڭدار دەپتى. ال ۆەتەرينار قان سوراتىن يت بولمايدى دەپ قاراپ وتىر.

«تاۋىقتاردىڭ موينىن بۇراعان، يتتەر ولاي مويىن بۇرامايدى. يت بولسا ءبىر بىردەن الىپ كەتۋ كەرەك» جەرگىلىكتى مال دارىگەرى داۋلەت بايسۇلتانوۆ.

 اۋىلدىڭ تاۋىعى مەن مەن قوي- ەشكىسىن قىرىپ بارا جاتقان يت ەمەس دەسە دە، جەرگىلىكتى بيلىك ءبىر كۇندە يەسىز جۇرگەن 20 ءيتتىڭ كوزىن جويعان. ءبىراق ماسەلە بۇنىمەن شەشىلگەن جوق. ەندى تۇرعىندار جۇمباق جانۋاردى ءوز كۇشتەرىمەن انىقتاپ كورمەك. بۇل ءۇشىن قاقپان قۇرىپ، تۇنىمەن كەزەكتەسىپ قورانى كۇزەتىپ ءجۇر.