تۋعان جەردى تۇلەتۋ - پارىز - نۇرلىباي جولدىباي ۇلى
بۇل تۋرالى تۋعان جەرى قازتالوۆ اۋدانى سارىقۇدىق اۋىلىنا مەدپۋنكت سالىپ بەرگەن جەرگىلىكتى كاسىپكەر نۇرلىباي جولدىباي ۇلى ءمالىم ەتتى، دەپ حابارلايدى «قازاقپارات» ءتىلشىسى.
جۋىردا قىرىق جاسقا تولعان نۇرلىبايدىڭ ايتۋىنشا، ورال قالاسىندا دا تىرشىلىك ەتىپ كورگەن. 1999 -جىلدان باستاپ شولمەك جيناپ، تاپسىرۋمەن اينالىسقان ول 2007 -جىلى ءبىرجولا اۋىلعا بەت بۇردى. تۋعان جەرگە دەگەن ساعىنىش قويا ما ءارى اتا-اناسى جولدىباي مەن عازيزانىڭ تۇڭعىشى بولعاندىقتان، ەلگە كەلىپ، ىنىلەرى ابىلاي، رۋسلان، ماردانمەن بىرگە باس بىرىكتىرىپ، قوجالىق اشىپ، ءتورت تۇلىك مال ءوسىرۋدى ءجون كوردى.
قازىرگى كەزدە «دارحان» شارۋا قوجالىعىنداعى جالپى مال سانى 600 دەن اسادى. 15-16 ادامدى جۇمىسپەن قامتىپ وتىر. وعان قوسا جول بويىندا «شاحيزادا» ءدامحاناسى جۇمىس جاسايدى. تۋعان اۋىل دەسە، جۇرەگى ەلجىرەپ تۇراتىن كاسىپكەر جەڭىستىڭ 70 جىلدىعىنا وراي سارىقۇدىق اۋىلىنداعى سوعىستا قازا تاپقان بوزداقتارعا ارنالعان «ەرلەر ەسىمى ەل ەسىندە» ەسكەرتكىشىن ءمارمار تاس قويىپ، كافەلدەتىپ، تۇگەلدەي جاڭارتتى.
وعان قوسا وتكەن جىلى مەدپۋنكت سالدى. ماتەريالىنىڭ وزىنە 5,2 ميلليون تەڭگە كەتسە، قۇرىلىسشىلاردى جالداعانى بار، ءىشى- سىرتىن قاپتاپ، سىلاعانى بار، بارلىعى 7-8 ميلليون تەڭگەگە بارىپ قالادى. كۇنى بۇگىن مەدپۋنكت اۋىل تۇرعىندارىنا قىزمەت ەتۋدە، فەلدشەرلىك جانە اكۋشەرلىك كابينەت، ەكپە بولمەسى جاڭا اپپاراتتارمەن قامتاماسىز ەتىلگەن، ناۋقاستار كۇندىزگى ستاتسيوناردا دا ەم الادى.
اتاپ وتەر جايت، كاسىپكەر مەدپۋنكت عيماراتىن مەملەكەت يەلىگىنە تولىقتاي بەردى. «مۇنداعى ماقساتىم - تۋعان اۋىلىمنىڭ كوركەيۋىنە ءوز ۇلەسىمدى قوسۋ. سوڭعى جىلدارى سارىقۇدىققا قاتقىل تاباندى جول جەتتى، ەندى اۋىز سۋ، گاز كەلەدى دەپ جاتىر. تاعى ءبىر ارمانىم - اۋىلدا جاڭادان مەكتەپ سالىنسا دەيمىن. وسىلايشا تولىق جاعداي جاسالسا، تۋعان جەرىنەن تۇرعىندار، اسىرەسە، جاستار كوشپەي، تۇراقتاپ قالار ەدى. بۇعان ءبىز سەكىلدى كاسىپكەرلەر، ەل ازاماتتارى قولۇشىن سوزىپ، ۇلگى كورسەتىپ، ىقپال ەتۋى ءتيىس دەپ ويلايمىن»، دەدى «قازاقپارات» تىلشىسىنە نۇرلىباي جولدىباي ۇلى.
اۆتور: ەلجان ەرالى
