مانشۇك مامەتوۆانىڭ رەسەيدەگى ەسكەرتكىشىن قورلاعان جاستار جۇرتتىڭ جاعاسىن ۇستاتتى - ۆيدەو

استانا. قازاقپارات - قازاقتىڭ باتىر قىزى مانشۇك مامەتوۆانىڭ رەسەيدەگى ەسكەرتكىشىن مازاق ەتكەن ءبىر توپ جاستىڭ بەينەجازباسى الەۋمەتتىك جەلىدە جاريا بولدى.

بۇل جاعداي رەسەيدىڭ پسكوۆ وبلىسىنا قاراستى نيەۆەل قالاسىندا بولعان. ۆيدەودا بەلگىسىز ەر ادامنىڭ ەسكەرتكىشكە شىعىپ الىپ، سۋرەتكە تۇسكىسى كەلگەنىن، ال دوستارى ونى سۋرەتكە ءتۇسىرىپ تۇرىپ، بەيادەپ سوزدەر ايتقانىن بايقاۋعا بولادى.

كەڭەس وداعىنىڭ باتىرى مانشۇك مامەتوۆا سۇراپىل سوعىس جىلدارى ءدال وسى پسكوۆتاعى نيەۆەل قالاسىن قورعاعانى بەلگىلى. قازاقتىڭ قارشاداي عانا قىزى اۋىر جارالانعانىنا قاراماستان پۋلەمەتتەن وق بۇركىپ، اسقان ەرلىك كورسەتتى دەپ جازادى Abai.kz.

ال 1978-جىلى پسكوۆتاعى نيەۆەل قالاسىندا باتىر قىزعا ەسكەرتكىش ورناتىلعان. ءتىپتى، قازىر قالادا مانشۇك مامەتوۆا اتىنداعى كوشە بار. باتىر قىزدىڭ بەيىتى دە نيەۆەل توپىراعىندا جاتىر.

«قازاقستاننىڭ سانكت-پەتەربۋرگتەگى باس كونسۋلدىعى كەڭەس وداعىنىڭ باتىرى مانشۇك مامەتوۆانىڭ پسكوۆ قالاسىنداعى ەسكەرتكىشىن قورلاعانداردى تاۋىپ، جاۋاپكەرشىلىككە تارتۋ بويىنشا رەسەيلىك قۇقىق قورعاۋ ورگاندارىنا حابارلاستى»، - دەپ حابارلادى قازاقستاننىڭ رەسەيدەگى ەلشىلىگىنىڭ باسپا ءسوز قىزمەتىنە سىلتەمە جاساپ Tengrinews.kz.

ەلشىلىكتەگىلەر رەسەي فەدەراتسياسىنىڭ قىلمىستىق كودەكسىندە مۇنداي قىلمىستارعا قاتىستى زاڭ بارىن جانە وسى زاڭدى بۇزعاندار جازالاناتىنىن ەسكە سالدى.