بۇعان دەيىن جاريالانباعان مومىش ۇلىنىڭ داۋىسى جازىلعان تاسپا تابىلدى - كەسكىن

استانا. قازاقپارات - تاراز مەملەكەتتىك پەداگوگيكالىق ينستيتۋتىنىڭ جانىنداعى «باۋىرجان تانۋ» عىلىمي-زەرتتەۋ ورتالىعىنىڭ قىزمەتكەرلەرى ورتالىق مەملەكەتتىك كينو فوتو قۇجاتتار مەن دىبىس جازبالارى مۇراعاتىنان باۋىرجان مومىش ۇلى تۋرالى جاڭا بەينە جانە دىبىس جازبالارىن تاپتى، دەپ حابارلايدى قازاقپارات.

«1944-جىلعى كينوجىلناما تابىلدى، - دەدى ج و و- نىڭ رەسمي وكىلى جاندار اسان. - بەينەجازبالاردا باتىردىڭ پانفيلوۆشىلاردىڭ ەرلىگى تۋرالى ەستەلىكتەرى مەن جاڭا جىلمەن قۇتتىقتاۋ ءسوزى بار. سونىمەن قاتار، مايدان دالاسىندا قازا تاپقان قازاق جاۋىنگەرىنىڭ اناسىنا كوڭىل ايتىپ بارعان ءساتى تاسپالانعان». «ءبىز مەملەكەتتىك مۇراعاتتىڭ ەرەكشە ەسەبىندەگى قورىنان باۋكەڭنىڭ جەڭىستىڭ 30 جىلدىعىنا بايلانىستى قازاقستان جازۋشىلارىمەن كەزدەسۋىندەگى سوزدەرىنىڭ جازبالارىن دا تاپتىق. بۇعان دەيىن جازبالار ەش جەردە جاريالانباعان»، - دەيدى ورتالىق قىزمەتكەرى ءالىمباي نايزابايەۆ.

سونىمەن قاتار، «باۋىرجان تانۋ» ورتالىعى حالىق قاھارمانى باۋىرجان مومىش ۇلىنىڭ كوپتومدىق شىعارمالار جيناعىنىڭ كەلەسى 15 تومى دايىندالۋدا.

بۇعان دەيىن ونىڭ 30 تومى جارىق كورگەن بولاتىن. 2004-جىلى اشىلعان ورتالىق حالىق قاھارمانى باۋىرجان مومىش ۇلىنىڭ مۇرالارىن جيناۋ، زەرتتەۋ جانە باسىپ شىعارۋ باعىتىندا جۇمىس اتقارادى. بۇعان دەيىن ۇلت ماقتانىشىنىڭ كوپ تومدىق شىعارمالار جيناعىنىڭ 30 تومى، ماسكەۋدەن «لەگەندارنىي باتىر» دەگەن اتپەن ەستەلىك كىتابى، الماتى قالاسىنان «فوتو قۇجاتتىق البومى» جارىق كوردى.

بۇگىندە ءباھادۇر باۋكەڭنىڭ كوپتومدىق شىعارمالار جيناعىنىڭ كەلەسى 15 تومدىعى دايىندالۋدا. كوپ تومدىقتا داڭقتى قولباسشى تۋرالى ەستەلىكتەر، درامالىق شىعارمالار، ارناۋلار، پوەمالار مەن باللادالار توپتاستىرىلعان.

31، 32، 33، 34، 35، 36، 37، 38-تومداردا ب. مومىش ۇلى تۋرالى بەلگىلى قالامگەرلەر، عالىمدار مەن قوعام قايراتكەرلەرىنىڭ ەستەلىكتەرى جيناقتالعان.

ولاردىڭ قاتارىندا مامىتبەك قالدىبايەۆ، دميتري سنەگين، ءازىلحان نۇرشايىقوۆ، تاحاۋي احتانوۆ، تاكەن ءالىمقۇلوۆ، تۇرسىن جۇرتباي، مىرزاتاي جولداسبەكوۆ، باحىتجان مومىش ۇلى، مەكەمتاس مىرزاحمەت ۇلى، مۇحتار شاحانوۆ، قاسىم قايسەنوۆ، شەرحان مۇرتازا، عابيت مۇسىرەپوۆ، زەينەپ احمەتوۆا، اكىم تارازي سىندى ازاماتتار بار.

ال 39-تومعا مالىك عابدۋلليننىڭ «باۋىرجان مومىشۋلى» اتتى ورىس تىلىندەگى وچەركى بەرىلگەن.

باتىر تۋرالى درامالىق شىعارمالار 40, 41-تومداردا. وندا شەرحان مۇرتازانىڭ «نوقتاعا باسى سىيماعان»، جاركەن بودەشتىڭ «جۇلدىزتاس» جانە وزگە دە جازۋشىلاردىڭ تۋىندىلارى بار.

42، 43-تومداردا جالپى سانى 200 ارناۋ ولەڭ توپتاستىرىلعان. 44-تومدا پوەمالار، 45-تومدا جىر، باللادالار جيناقتالعان.

«جالپى، دۇنيە جۇزىندە باۋكەڭ تۋرالى جازىلعان ەڭبەكتەر وتە كوپ. سولاردىڭ ءبارىن جيناپ، اۋدارۋ قاجەت. وسىلاردى رەتتەسەك، باتىر اعامىزدىڭ 100 تومدىعىن شىعارۋعا مۇمكىندىگىمىز بار»، - دەپ اتاپ ءوتتى ورتالىق قىزمەتكەرلەرى.

تاراز مەملەكەتتىك پەداگوگيكالىق ينستيتۋتىنىڭ رەكتورى داريا قوجامجاروۆانىڭ قولداۋىمەن ورتالىق بۇگىندە قازاقستان رەسپۋبليكاسى ورتالىق مەملەكەتتىك مۇراعاتىنداعى باۋىرجان مومىش ۇلىمەن قارىم-قاتىناستا بولعان قوعام قايراتكەرلەرى، اقىن-جازۋشىلار باسقا دا ونەر ادامدارىنىڭ جەكە قورلارىنداعى باۋكەڭە بايلانىستى ارحيۆتىك قۇجاتتاردى جيناقتاۋ ۇستىندە.