باكۋدەگى تۇركى كەڭەسىندە بىرلەسكەن شاراعا دايىندىق بارىسى تالقىلاندى

باكۋ. قازاقپارات - باكۋدە تۇركى كەڭەسى ەلدەرىنىڭ جاستار جانە سپورت ىستەرى مينيسترلەرىنىڭ وتىرىسى ءوتتى.

بۇل تۋرالى ازەربايجانداعى «قازاقپارات» ح ا ا مەنشىكتى ءتىلشىسى حابارلادى. قازاقستان اتىنان ءدىن جانە ازاماتتىق قوعام ۆيتسە-ءمينيسترى بەرىك ارىن مەن تۇركيا، ازەربايجان، قىرعىزستان جاستار جانە سپورت بويىنشا مەملەكەتتىك ورگاندارىنىڭ باسشىلارى قاتىستى.

وتىرىس بارىسىندا قاتىسۋشىلار جاستار جانە سپورت سالاسىنداعى ىنتىماقتاستىق جونىندەگى جۇمىس توبىنىڭ قىزمەتىن رەتتەيتىن قۇجاتتى، تۇركى كەڭەسىنىڭ جاستار پلاتفورماسى رەگلامەنتىن ماقۇلداپ، تۇركى كەڭەسى ەلدەرىندە ءبىرقاتار ءىرى بىرلەسكەن شارالار جۇرگىزۋگە دايىندىق بارىسىن تالقىلادى.

3-دۇنيەجۇزىلىك كوشپەندىلەر ويىندارى، 1- تۇركى ۋنيۆەرسياداسى، تۇركى كەڭەسىنىڭ 1- جاستار فەستيۆالى جانە ت. ب. ءوز سوزىندە ب. ارىن قاتىسۋشىلاردى «بولاشاققا كوزقاراس: قوعامدىق سانانى جاڭعىرتۋ» اتتى ق ر پرەزيدەنتى ن. نازاربايەۆتىڭ باعدارلامالىق ماقالاسىندا ايتىلعان نەگىزگى باستامالارىمەن تانىستىردى. سونداي-اق ۇلتتىق تاريحتى، ءداستۇردى جاڭعىرتۋدا، مادەنيەت ەسكەرتكىشتەرىن ساقتاۋدا تۇركى كەڭەسى ەلدەرىمەن ىنتىماقتاستىقتىڭ ماڭىزدىلىعىن اتاپ ءوتتى.

ول سونداي-اق تۇركىتىلدەس ەلدەردى اقمولا وبلىسى زەرەندى اۋىلىندا 2017-جىلعى 10-16-شىلدە ارالىعىندا وتەتىن تۇركى كەڭەسىنە قاتىسۋشى ەلدەردىڭ Ⅲ حالىقارالىق جاستار جازعى لاگەرىنە بەلسەندى قاتىسۋعا شاقىردى. ءوز ساپارى اياسىندا ۆيتسە-مينيستر ازەربايجاننىڭ ءدىني ۇيىمدارىمەن جۇمىس بويىنشا مەملەكەتتىك كوميتەتىنىڭ ءتوراعاسى مۋباريز گۋربانلىمەن ەكىجاقتى كەزدەسۋ وتكىزدى.

وندا ءدىني ۇيىمداردىڭ قىزمەتىن رەتتەۋ ماسەلەلەرى مەن وسى سالاداعى ەكى ەلدىڭ تاجىريبەسى تالقىلاندى. بۇدان باسقا، باكۋ مەملەكەتتىك ۋنيۆەرسيتەتىنىڭ جانىنداعى اباي ورتالىعىنا بارىپ، رەكتورى ابەل ماگەرراموۆپەن كەزدەستى. جاستاردىڭ ۇلتتىق مادەنيەت پەن داستۇرگە سۇيىسپەنشىلىگىن داعدىلاندىرۋعا باعىتتالعان جوبالاردى ىسكە اسىرۋ بويىنشا ىنتىماقتاستىق تۋرالى ۋاعدالاستىققا قول جەتكىزىلدى.