09:32, 12 - مامىر 2017 | GMT +5
ساۋد ارابياسىندا قايتىس بولعان وتانداسىمىز ءمادينادا جەرلەندى
استانا. قازاقپارات - ساۋد ارابياسىندا وتانداسىمىز قايتىس بولدى. ءمادينا قالاسىنداعى قۇران وقۋ ورتالىعىندا ءتالىم الىپ جۇرگەن 7 جاسار احمەت توشبيكوۆ ءۇشىنشى قاباتتاعى باسپالداقتان قۇلاعان دەپ حابارلايدى «ك ت ك» ارناسى.
جانتۇرشىگەرلىك وقيعا مەدرەسە ىشىندەگى كامەراعا ءتۇسىپ قالىپتى. مۇندا باسپالداقتىڭ ۇستايتىن جەرىمەن سىرعاناپ تۇسپەكشى بولعان شاكىرتتىڭ ارى قاراي اۋىپ كەتىپ قۇلاعانى انىق كورىنەدى.
ال، وسى كەزدە وزگە وقۋشىلارمەن سويلەسىپ تۇرعان ۇستاز احمەتتى كورمەي قالعان. ايتا كەتەرلىگى، ساۋد ارابياسىندا ءبىلىم الىپ جاتقان مارقۇمنىڭ اكە-شەشەسى دە 6 جىلدان بەرى سوندا تۇرادى ەكەن.
سوندىقتان كوز جۇمعان وتانداسىمىز كونسۋلدىقتىڭ كومەگىمەن ءمادينادا جەر قويىنىنا تاپسىرىلعان.
«كونسۋلدىققا تاپسىرعان ارىزدا بالانىڭ اكەسى ۆيدەودا بالانىڭ قۇلاعانىن ءوز كوزىمەن كورگەنىن ايتقان. ەشكىم ونى يتەرمەستەن قۇلاعانىن راستادى. سوندىقتان اكەسى بالاعا قاتىستى ەشكىمگە نارازىلىقتى بىلدىرمەدى»، - دەيدى س ءى م باسپا ءسوز حاتشىسى ءانۋار جايناقوۆ.
