قازاقستاننىڭ تۇركياداعى ەلشىسى قازاق جاستارىمەن كەزدەستى

استانا. قازاقپارات - قازاقستاننىڭ تۇركياداعى توتەنشە جانە وكىلەتتى ەلشىسى ابزال ساپاربەك ۇلى انكاراداعى جوعارى وقۋ ورىندارىندا ءبىلىم الىپ جۇرگەن قازاق جاستارىمەن كەزدەستى.

بۇل تۋرالى ەلشىلىكتىڭ فەيسبۋك الەۋمەتتىك جەلىسىندەگى رەسمي پاراقشاسىندا حابارلاندى. كەزدەسۋدە ەلشى بيىل جاريالانعان قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى حالىققا ارناعان جولداۋى مەن «بولاشاققا باعدار: رۋحاني جاڭعىرۋ» اتتى ماقالاسىنىڭ نەگىزگى باعدارلارى تۋرالى مالىمەت بەردى.

سونىمەن قاتار، قازاقستاننىڭ سىرتقى ساياساتىنداعى جەتىستىكتەرى مەن قازاقستان-تۇركيا قارىم-قاتىناسى تۋرالى جانە اعىمداعى جىلى استانادا وتەتىن ەكسپو-2017 حالىقارالىق مامانداندىرىلعان كورمەسى تۋرالى اڭگىمە قوزعادى.

ءوز كەزەگىندە انكارادا ءبىلىم الىپ جۇرگەن قازاق جاستارى ەلباسىنىڭ ۇستانعان ساياساتى مەن رەسپۋبليكالىق باسىلىمداردا جارىق كورگەن ماقالاسى تۋرالى پىكىرلەرىن ءبىلدىردى.

ماقالادا اتالعان ماسەلەلەر بويىنشا قولداۋ كورسەتۋگە، ەلشىلىكتىڭ ۇيىمداستىرىپ وتىرعان ءىس-شارالارىنا قاتىسىپ تۇرۋعا نيەت ءبىلدىرىپ، قازاقستاننان كەلەتىن زيالى قاۋىم وكىلدەرىمەن كەزدەسۋگە دايىن ەكەندىكتەرىن جەتكىزدى.

سونداي-اق، ۋنيۆەرسيتەتتەردە جاستار كلۋبىنىڭ اشىلۋى، ۇلتتىق سالت-ءداستۇردى ناسيحاتتايتىن شارالاردىڭ ءوتۋى جانە تۇرىك جاستارىمەن ىنتىماقتاستىقتى كۇشەيتەتىن جوبالاردى قولعا الۋى بويىنشا ۇسىنىستار جاسادى.

ەلشى ابزال ساپاربەك ۇلى قازاق جاستارىنا مۇنداي كەزدەسۋلەردى ءجيى-ءجيى وتكىزۋگە ۋادە بەردى. سونىمەن قاتار، ەلشىلىكپەن تىعىز قارىم-قاتىناستا بولۋلارىنا كەڭەس بەردى. كەزدەسۋ سوڭىندا جاستار ەلشىگە العىس ءبىلدىرىپ، جاڭا قىزمەتىنە تابىس تىلەدى.