قازاقتىڭ داڭىقتى بالۋانى ازيا كۇرەس كەڭەسىنىڭ پرەزيدەنتى بولىپ سايلاندى

استانا. قازاقپارات -  بۇگىن قۇرلىقتىق كونگرەسستە داۋلەت بولات ۇلى تۇرلىحانوۆ ازيا كۇرەس كەڭەسىنىڭ پرەزيدەنتى بولىپ سايلاندى، دەپ حابارلايدى قازاقپارات.

سايلاۋعا 14 ۇمىتكەر قاتىسقان. ناتيجەسىندە قازاقتىڭ داڭىقتى بالۋانى ەڭ كوپ داۋىس جيناپ، ازيا كۇرەس كەڭەسىنىڭ پرەزيدەنتى بولىپ سايلاندى.

ايتا كەتەيىك، داۋلەت تۇرلىحانوۆ بۇگىنگى تاڭدا قازاقستاننىڭ گرەك-ريم، ەركىن جانە ايەلدەر كۇرەس فەدەراتسياسىنىڭ ۆيتسە-پرەزيدەنتى قىزمەتىن اتقارىپ كەلەدى.

ەستەرىڭىزگە سالا كەتەيىك، داۋلەت بولات ۇلى تۇرلىحانوۆ 1963-جىلى 18- قاراشادا شىعىس قازاقستان وبلىسىنىڭ جارما اۋدانىندا دۇنيەگە كەلگەن. گرەك-ريم كۇرەسىنەن ەڭبەك سىڭىرگەن سپورت شەبەرى، قازاقستاننىڭ ەڭبەك سىڭىرگەن قايراتكەرى، قازاقستان جانە قىرعىزستان رەسپۋبليكالارىنىڭ ەڭبەك سىڭىرگەن جاتتىقتىرۋشىسى.

قازاقستاننىڭ جانە حالىقارالىق تۋرنيرلەردىڭ جەڭىمپازى، ك س ر و- نىڭ جەتى دۇركىن چەمپيونى، ك س ر و حالىقتارى سپارتاكياداسىنىڭ كۇمىس جۇلدەگەرى، جانە جەڭىمپازى، ەۋروپا چەمپيونى، الەم چەمپيونى جانە كۇمىس جۇلدەگەرى، قولا جۇلدەگەرى، الەم كۋبوگىنىڭ ەكى مارتە جەڭىمپازى، 12- ازيا ويىندارىنىڭ جەڭىمپازى، ازيانىڭ ەكى دۇركىن چەمپيونى، 24-25- وليمپيادالىق ويىندارىنىڭ كۇمىس، قولا جۇلدەگەرى بولعان.

1995-1999-جىلدارى ەكى مارتە قازاقستان رەسپۋبليكاسى پارلامەنتى ءماجىلىسىنىڭ دەپۋتاتى بولىپ سايلانعان. 2000-2006-جىلدارى تۋريزم جانە سپورت اگەنتتىگىنىڭ ءتوراعاسى، مادەنيەت، اقپارات جانە سپورت مينيسترلىگى سپورت كوميتەتىنىڭ ءتوراعاسى قىزمەتتەرىن اتقارعان.

اۆتور: كۇنسۇلتان وتارباي