الەمدەگى ەڭ ۇلكەن جاساندى كۇن گەرمانيادا قۇراستىرىلدى

استانا. قازاقپارات - گەرمانيا ەلى جاساندى قۋات كوزدەرىن وندىرەتىن ەڭ دامىعان ەلدەردىڭ ءبىرى بولىپ تابىلادى.

سوعان دالەل - گەرمانيانىڭ يۋليح قالاسىنداعى اەروعارىشتىق ورتالىقتا (DLR) الەمدەگى ەڭ ۇلكەن ءارى قۋاتتى جاساندى كۇننىڭ قۇرىلىسى اياقتالدى.

Synlight اتالمىش ءۇش قاباتتى قۇرىلىس نىسانى ءتۇرلى زەرتتەۋ جۇمىستارى مەن جارىقتى پايدالانا وتىرىپ، سۋتەگى وتىنىن وندىرەتىن قۇرىلعى رەتىندە پايدالانىلاتىن بولادى.

زەرتحاناداعى «كۇن» ويىسقان پارابولالىق رەفلەكتەر سەكىلدى قۇراستىرىلىپ، ىشىنە 7 كيلوۆاتتىق 150 شام ورناتىلعان. جارىقتىڭ بارلىعى كولەمى 20*20 بولاتىن نۇكتەگە باعىتتالعان. بارلىق شامدار ىسكە قوسىلعاندا تەمپەراتۋرا 3500 °س - گە دەيىن جەتىپ، جارىق قالىپتى دەڭگەيدەن  10000 ەسە ارتادى. جاساندى كۇننىڭ كومەگىمەن عالىمدار سۋ بۋىنان سۋتەگىنى ءبولىپ شىعارۋدى قولعا الماق. ەگەر جوسپار تولىقتاي جۇزەگە اساتىن بولسا، ۇشاقتار مەن كولىكتەرگە ەكولوگيالىق جانارمايدى وندىرۋگە بولادى.

بۇل جوبانى جۇزەگە اسىرۋعا 3,5 ميلليون ەۋرو قارجى جۇمسالعان ەكەن.

The Qazaq Times