استاناداعى «ماڭگىلىك ەل» اركاسىنىڭ ۇستىندە شولۋ الاڭى اشىلدى
ەل تاۋەلسىزدىگىنىڭ 20 جىلدىعىنا ارناپ تۇرعىزىلعان سالتاناتتى اركانىڭ بيىكتىگى دە 20 مەتردى قۇرايدى. شولۋ الاڭىنا دەيىن كەلۋشىلەردى كاسىپقوي گيدتەر اقمولا ءوڭىرىنىڭ قالىپتاسۋى مەن تاريحى كورسەتىلگەن فوتوسۋرەتتەرى بار باسپالداقپەن الىپ جۇرەدى جانە قازاق، ورىس، اعىلشىن تىلدەرىندە قالا تاريحىمەن تانىستىرادى.
ەرەكشە كۇتىمدى قاجەت ەتەتىن كەلۋشىلەر ءۇشىن ارنايى ليفت ورناتىلعان. قاقپانىڭ جەتىنشى قاباتىندا اۋماعى 120 شارشى مەتر بولاتىن جاڭا كورمە زالى ورنالاسقان. وندا شەتەلدىك جانە وتاندىق سۋرەتشىلەردىڭ، مۇسىنشىلەردىڭ، ساندىك-قولدانبالى ونەر شەبەرلەرىنىڭ تۋىندىلارى قويىلىپ، ءتۇرلى فوتوكورمەلەر وتكىزىلەدى دەپ جوسپارلانعان.
كورمە زالى ارقىلى قاقپا توبەسىندە ورنالاسقان شولۋ الاڭىنا شىعۋعا بولادى. كەلۋشىلەر شولۋ الاڭىنىڭ ءتورت بۇرىشىنا قويىلعان ءتورت دۇربىمەن تۇتاس قالانى تاماشالاي الادى. «قاقپا دۇيسەنبىدەن وزگە بارلىق كۇنى، تاڭعى 10 نان كەشكى17:00 گە دەيىن جۇمىس ىستەيدى.
ارينە، ەكسپو قارساڭىندا قالا قوناقتارىنىڭ كوبەيۋىنە بايلانىستى، جۇمىس ۋاقىتىن ۇزارتۋ كوزدەلىپ وتىر. كىرۋ قۇنى ەرەسەكتەرگە - 500 تەڭگە، بالالارعا - 350 تەڭگە. بۇل ورىننان كەلۋشىلەردىڭ قازاق حالقىنىڭ ونەرى مەن مادەنيەتى تۋرالى وتە قۇندى دەرەكتەر مەن ۇمىتىلماس اسەر الىپ كەتەرى انىق.
جاڭا شولۋ الاڭى تۋريستەردىڭ قىزىعۋشىلىعىن وياتىپ قانا قويماي، تۇلەكتەر مەن جاس جۇبايلار اراسىندا تانىمال ورىنعا اينالارىنا ۇمىتتەنەمىز»، - دەپ اتاپ ءوتتى استانا قالاسى مادەنيەت، مۇراعاتتار جانە قۇجاتتاما باسقارماسى باسشىسىنىڭ ورىنباسارى ناريما مۇحامبەتالينا.
اتاپ وتكەن ءجون، سالتاناتتى اركالاردا شولۋ الاڭدارى مەن كورمە زالدارىن اشۋ الەمدىك تاجىريبەدە بار. وعان دالەل - پاريج، بارسەلونا، مۋمباي، بۋحارەست قالالارىنداعى قاقپالار.
اسىرەسە، پاريجدىڭ شارل دە گولل الاڭىندا ورنالاسقان تريۋمفالدى اركاعا جىل سايىن ميلليونداعان تۋريستەر كەلەدى. «ماڭگىلىك ەل» سالتاناتتى اركاسى - قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ باستاماسىمەن 2011-جىلى تۇرعىزىلعان.
اۆتورلارى - ساۋلەتشى ساعىندىق جامبولاتوۆ جانە مۇسىنشىلەر مۇرات مانسۇروۆ پەن نۇرلان دالباي.
اۆتور: ايجان سەرىكجان قىزى
