وقىعان، جۇمىسى بار قازاق قىزدارى نەگە تەڭىن تاپپاي وتىر؟

استانا. قازاقپارات - قازىرگى قوعامداعى ماسەلەنىڭ ءبىرى - وقىعان- توقىعان، جۇمىسى بار قىزداردىڭ تەڭىن تاپپاي وتىرعانى.

 كەيبىر دەرەكتەرگە قاراعاندا، ەلىمىزدەگى 18 بەن 35 جاس ارالىعىنداعى 700 مىڭ تۇرمىسقا شىقپاعان قىزعا 300 مىڭ بويداق كەلەدى ەكەن. وسى ورايدا استانا ارناسى مۇنىڭ سەبەبىن ءبىلۋ ءۇشىن بىرنەشە قىزدى اڭگىمەگە تارتتى.

دينارا. جاسى 32-دە. ءوزىن «كارى قىزدار» ساناتىنا قوسۋدان اۋلاق. كەرىسىنشە، ءوزىن «تارتىمدى» قالىندىقپىن دەپ سانايدى. جەكە كاسىبى بار. سونىڭ جەمىسىن كورىپ، «نە كيەم، نە ىشەم دەگەنگە» باسى قاتىپ ۋايىمدامايدى.

"مەن جاسپىن، ادەمىمىن. جوعارى ءبىلىمىم، تۇراقتى جۇمىسىم بار. اتا- اناما ماسىل ەمەسپىن. تىرشىلىك ەتىپ، ءوز- ءوزىمدى قامتىپ وتىرمىن. اۋقاتتى دەمەۋشى نە بولماسا اقشالى جىگىتىم دە جوق. ومىرىمە ريزامىن. وسى كۇنگە دەيىن تۇرمىس قۇرماۋىمنىڭ سەبەبى - وزىمە ساي ادامدى كەزدەستىرمەدىم. شىنى كەرەك، قازىرگى جىگىتتەردىڭ كوبى «بالا» سياقتى. جاۋاپكەرشىلىكتەن جۇرداي. ىڭعايى كەلسە ءبارىن ايەلدىڭ موينىنا جۇكتەپ قويعىسى كەلەدى. ونداي جىگىتتىڭ قاجەتى قانشا؟ !

قازاقتىڭ ماقالىمەن ايتاتىن بولساق، «وتىرعان قىز ورنىن تابادى» . ول جاعىنا مەن قام جەمەيمىن. اتا- انام ماعان ول تۋرالى ەشتەڭە ايتپايدى. ولار مەنىڭ نەنى قالايتىنىمدى بىلەدى، قانداي ەر ادامدى. سوندىقتان، مەنىڭ ءومىرىمدى تۇرتكىلەمەيدى"، - دەيدى دينارا.

شىمكەنتتىك بويجەتكەن مايرانىڭ دا جاسى وتىزدان اسقان. ءمۇعالىم بولىپ جۇمىس ىستەيدى. ۇجىمدا بەدەلدى. جازدا مەملەكەتتىك- جەرگىلىكتى باسقارۋ ماماندىعى بويىنشا ەكىنشى ديپلومىن الماق. تابيعاتىنان مومىن، وتە قاراپايىم، ءارى ۇيالشاق.

"تاڭداۋ دەگەن نەگىزى مەندە بولعان جوق، ماتەريالدىق جاعىنان. ول جاعىنان ءتىپتى ىزدەگەن دە جوقپىن. ويىمدا دا بولعان جوق ول نارسە. تەك وي- ءورىسى وزىممەن دەڭگەيلەس ادام بولعانىن قالادىم. ءبىراق سول جاعىنان كوپ مەندە كەدەرگىلەر بولدى. قازىرگى جىگىتتەردىڭ ويلاۋ دەڭگەيىنىڭ، ومىرگە دەگەن كوزقاراسىنىڭ تومەندىگى، ولاردىڭ جۇمىس ماسەلەسىندە جالقاۋلىعى، وسى ماسەلە كوڭىلىمنەن شىققان جوق، شىنىن ايتقاندا"، - دەيدى مايرا.

«تاڭداعان تازعا جولىعادى» دەگەندى مايرا جاقسى بىلەدى. جالعىزدىق قۇدايعا عانا جاراسقان، ۇسىنىس تۇسسە، شىعا سالام، دەپ شورت كەسكەن كەزدەرى دە بولىپتى. ءبىراق، كوزقاراسى مەن ومىرلىك ۇستانىمى سايكەسپەگەن جانمەن تاعدىرىن قوسۋ قاتەلىك ەكەنىن تۇسىنگەن.

 " ءۇمىتىم بار ەندى. جالعىز بولىپ قالعىم كەلمەيدى شىن مانىندە. ءوزىمنىڭ وتباسىم، بالالارىم بولعانىن قالايمىن. ءدال قازىر مەندەگى ۋايىم وسى بالا ماسەلەسى. ەگەر كەش شىعىپ قالسام ايەلدىڭ باقىتى، بولاشاعى ءبارى وسى بالامەن بايلانىستى عوي، تەك وسى جاعى مەنى شىن مانىندە قاتتى تولعاندىرادى"، - دەيدى مايرا.

ءلاززات سەيىلحاندى ورالدىقتار جاقسى بىلەدى. تۋعان كۇن، قۇدالىق، ۇيلەنۋ تويى، سۇندەت توي مەن مەرەيتويلار ونىڭ "جۇلدىز- شوۋ" توبىنسىز وتپەيدى. قازاقتىڭ تويى ءبىتسىن بە، بويجەتكەن ءار كۇن دەرلىك توي- تومالاققا بارادى. ەسەپتەپ كورسەك، ءبىر تويدا كەمىندە 200 ادام بولسا، ءلاززات اپتاسىنا 2000 اداممەن بەت كورىسەدى ەكەن. ءبىراق وسىنشا جۇرتتىڭ ىشىنەن ءوزىنىڭ باعىن اشىپ، ومىرلىك سەرىگى بولاتىن نار جىگىتتى تابا الماي ءجۇر. جاسى 31 گە كەلسە دە، تۇرمىس قۇرۋعا اسىقپايدى. ايتۋىنشا، بۇعان ەر ازاماتتاردىڭ وزدەرى كىنالى.

"كوپ جىگىت ءسوز سالعاندا قايدا جۇمىس ىستەيسىڭ؟ ايلىعىڭ قانشا؟ كولىگىڭ بار ما؟ ءۇيىڭ با ما؟ سوعان قاراعاندا مەن ويلايمىن، جاعدايى بار قىزداردى ۇناتاتىن سياقتى قازىرگى جىگىتتەر"، - دەيدى ءلاززات سەيىلحان.

دايىن اسقا تىك قاسىق، دەمەكشى ءلاززات «كۇشىك كۇيەۋ» اتانۋعا ءازىر تۇرعان تالاي جىگىتتى كوزى كورگەن. ايتۋىنشا، بۇل ەر ازاماتقا جاراسپايتىن قىلىق. ءبىر سوزبەن ايتساق، نامىسسىزدىق. ەركەكتىڭ باستى قارۋى - ەڭبەكقورلىعى.

سوندىقتان بولاشاق جارىم جۇمىستان قورىقپايتىن، ءىسى مەن سوزىنە بەرىك، جاۋاپكەرشىلىگى مول ادام بولسا، دەپ ارماندايدى.

nur.kz