اسانالى ءاشىموۆ: تۋىسقاندارىم مەنىڭ تاڭداعان ماماندىعىمدى ۇيات ساناعان ەدى
باقىت قايىربەكوۆ اتالعان دەرەكتى فيلمدى وسىدان 5 جىل بۇرىن تۇسىرگەن. فيلم اكتەردىڭ 80 جىلدىق مەرەيتويىنا ارنالادى. اسانالى ءاشىموۆ رەجيسسەر جۇمىسىنا جوعارى باعا بەردى.
«مەن بۇگىن بۇل فيلمدى ءبىرىنشى رەت كورىپ وتىرمىن. باقىت قايىربەكوۆ قازاقستاندىقتار اراسىندا تانىلعان ادام. ونىڭ بۇل ەڭبەگىن جوعارى باعالايمىن، ماعان قاتتى ۇنادى. مەن بۇل فيلمدى جاقسى جۇمىس دەپ ەسەپتەيمىن. باقىتتىڭ وزىنە دە جۇمىس قورىتىندىسى ۇناپ وتىر» ، - دەدى ءاشىموۆ.
باقىت قايىربەكوۆتىڭ دەرەكتى ءفيلمى حالىقتىڭ سۇيىكتىسىنە اينالعان ءارتىستىڭ ءومىر جولىنا ارنالعان. وندا شەبەردىڭ بەلەستەردى باعىندىرۋ جولىنداعى قاجىرلى ەڭبەگى كورسەتىلگەن. شىنىمەن دە، اسانالى اشىموۆكە بۇل شىڭنان كورىنۋ ءۇشىن قانشا تاباندىلىق پەن قايرات كورسەتۋ قاجەت بولدى. ويتكەنى، ول بۇل جولدى تاڭداردا ونىڭ اعايىندارى باسىندا قارسىلىق تا تانىتقان.
«باسىندا شەشەم ديپلوم الىپ، وقۋ وقىساڭ بولدى دەگەن. سوسىن، مەن ءوز تاڭداۋىمدى جاساپ ەدىم، تۋعان اعام ونداي كاسىپتى ەستىگىسى دە كەلمەيتىنىن ايتتى. ول مۇنى ۇيات دەپ ەسەپتەيدى ەكەن. تۇقىمىمىزدا ءارتىس بولماعان دەيدى. كەيىن مەن س س ر حالىق ءارتىسى دەگەن اتاق العانىمدا تاڭداۋىمنىڭ دۇرىس بولعانىن ايتىپ، ماقتان تۇتتى» ، دەپ ەسكە الدى مەرەيتوي يەسى.
فيلمدە اقساقالدىڭ ومىردە ورنى تولماس قازالارعا دۋشار بولعانى دا ايتىلادى. الدىمەن اناسىن، كەيىن جان جارىن، سوسىن، ءبىر جىلدا ەكى ۇلىن جەر قوينىنا تاپسىرعانىن ءوزى ايتىپ بەرەدى. ءبىراق، بۇگىنگى جارى مەن قازىر ءۇشىنشى سىنىپقا باراتىن ۇلى ومىرىنە ءنار بەرگەن.
«مەن تۇرمىسقا كەش شىقتىم. وزىمە لايىقتى جار ىزدەدىم. اسانالى مەنىڭ تاعدىرىم ەكەنىن ءتۇسىندىم. ول بىزگە اۋرۋحاناعا تۇسكەندە مەن ونىڭ كوزىنەن اۋىرتپاشىلىقتى كوردىم. مۇنداي ادام جىلاماۋى كەرەك دەپ ويلادىم. ول ماعان ومىردەگى ەڭ باستى سىيلىق ۇلىمدى سىيلادى» ، - دەدى اكتەردىڭ جارى باعدات ءاشىموۆا.
باقىت قايىربەكوۆتىڭ فيلمى مەتر تۋرالى جالعىز ەڭبەك قانا ەمەس، قازىرگى ۋاقىتتا «قازاقفيلم» ءارتىستىڭ ءومىرى تۋرالى ءتۇسىرىپ جاتقان تۋىندىنى اياقتاۋعا جاقىن. ول فيلم ەكسپو اياسىندا كورسەتىلمەك. حالىق ءارتىسىنىڭ 80 جىلدىڭ مەرەيتويى استانادا اتالىپ وتىلەدى.
اۆتور: الماس مۇقاش ۇلى
