استانادا بوكستان قىزدار اراسىنداعى ەل چەمپيوناتى باستالدى-فوتو
قازاقستان بوكس فەدەراتسياسىنىڭ مالىمەتىنشە، بايراقتى باسەكەگە الەم چەمپيوندارى نازىم قىزايباي، دينا جولامان، ۆالەنتينا حالزوۆا جانە ءلاززات كۇنگەيبايەۆا، سونىمەن قاتار ريو وليمپياداسىنىڭ قاتىسۋشىلارى جاينا شەكەربەكوۆا مەن داريعا شاكىموۆا قاتىسادى.
چەمپيوناتتىڭ قورىتىندىسى بويىنشا ۇلتتىق كوماندانىڭ جاڭا قۇرامى جاساقتالادى. 2020 -جىلى توكيودا وتەتىن وليمپيادانىڭ اياسىندا باپكەرلەر قۇرامى «وليمپيادالىق» سالماق دارەجەلەرى 51, 60 جانە 75 كەلىگە ەرەكشە ءمان بەرەدى.
جازعى ماۋسىمدا حالىقارالىق بوكس قاۋىمداستىعى مەن حالىقارالىق كوميتەتى 57 جانە 69 كەلى سالماققا دەيىنگىلەردى وليمپيادا باعدارلاماسىنا ەنگىزۋ ماسەلەسىن قاراستىرماق. وسىعان وراي ۇلتتىق كومانداعا كىرۋدى ماقسات قويعان جانە وليمپياداعا جولداما العىلارى كەلەتىن قىزدار اراسىندا وسى بەس سالماق ناعىز باسەكەلەستىكتى قىزدىرماق.
«ءبىز قازىر 2020 -جىلى توكيودا وتەتىن وليمپيادالىق كەزەڭنىڭ باسىندا تۇرمىز. ءبىراق ول بوساڭسۋعا ءالى دە ۋاقىت بار دەگەندى بىلدىرمەيدى. دەمەك، ۇلتتىق كومانداعا وتەتىن سپورتشىلاردى ءتورت جىل بويى تىنباي جاتتىعۋلار مەن قاتاڭ باسەكەلەستىك جارىستار كۇتۋدە. سوندا عانا ءبىز ءوز باسەكەلەستەرىمىزدەن قالىس قالمايمىز. ايماقتاردا دا قىزدار بوكسىنا ەرەكشە ءمان بەرۋىمىز كەرەك جانە ولار ەڭ جاقسى دايىندىقپەن كەلگەن استانالىق كوماندادان تاجىريبە العاندارىن قالايمىز. وليمپيدالىق مۇمكىندىكتەرىن ەسەپكە العاندا، بۇگىن باستاعان قىزدارىمىزدان ەرتەڭ ەلىمىزدىڭ اتاعىن شىعاراتىن التىن مەدالدى كۇتۋگە بولادى»، - دەدى ۇلتتىق كوماندانىڭ باپكەرى ۆاديم پريسياجنيۋك.
ايتا كەتەرلىگى، چەمپيوناتتىڭ فينالدىق كەزدەسۋلەرى 8 - مامىردا وتەدى.
اۆتور: مارلان جيەمباي
