نىعماتۋلين مەديتسينالىق ساقتاندىرۋ جۇيەسىن ەنگىزۋدە دۇرلىگۋگە جول بەرمەۋگە شاقىردى

استانا. قازاقپارات - مەديتسينالىق ساقتاندىرۋ جۇيەسىن ەنگىزۋدە تىركەۋ كەزىندەگى تۇسىنىسپەۋشىلىكتەر قايتالانباۋى ءتيىس. مۇنداي پىكىردى بۇگىن پالاتانىڭ جالپى وتىرىسىندا ءماجىلىس ءتوراعاسى نۇرلان نىعماتۋلين ءبىلدىردى،

 دەپ حابارلايدى قازاقپارات.

 ءماجىلىستىڭ باسپا ءسوز قىزمەتىنىڭ حابارلاۋىنشا، دەنساۋلىق ساقتاۋ ماسەلەلەرى بويىنشا زاڭنامالىق تۇزەتۋلەردى العاشقى وقىلىمدا قاراۋ بارىسىنداعى ەڭ كوپ تالقىلانعان ماسەلەلەردىڭ ءبىرى - مەديتسينالىق ساقتاندىرۋدى ەنگىزۋگە اقپاراتتىق جۇيەنىڭ دايىندىعى بولدى. ءماجىلىس سپيكەرى جىل باسىندا ح ق و- لاردا ازاماتتاردى تىركەۋدىڭ جاڭا ءتارتىبىن جۇزەگە اسىرۋعا جاۋاپتى مەملەكەتتىك ورگانداردىڭ دايىن بولماعانىن ەسكە سالىپ، وتكەن قاتەلىكتەردى قايتالاماۋ ءۇشىن الدىن الا بارلىق قاۋىپ- قاتەرلەردى نازارعا الۋ قاجەتتىگىن باسا ايتتى.

 - تىركەۋ بارىسىندا قانداي ايعاي- شۋ، قانداي دۇرلىگۋ بولعانىن بىلەسىزدەر. وسىعان بايلانىستى، «ازاماتتارعا ارنالعان ۇكىمەتكە»، اكىمدىكتەرگە الەۋمەتتىك مەديتسينالىق ساقتاندىرۋ قورىمەن بىرلەسىپ، جاڭا جۇيەگە ەنۋگە حالىق دايىن بولاتىنداي جۇمىستاردى ۇيىمداستىرۋى قاجەت. جانە بۇل جۇمىستاردى مەديتسينالىق قىزمەتكەرلەردەن باستاۋ كەرەك، ولار كۇزگە دەيىن مەديتسينالىق مەكەمەلەرگە تىركەلگەن ازاماتتاردىڭ مەديتسينالىق ساقتاندىرۋ جۇيەسىندەگى مارتەبەسىمەن بىرگە ءتىزىمىن قۇرۋى ءتيىس، - دەدى نىعماتۋلين.

 ءماجىلىس ءتوراعاسىنىڭ ايتۋىنشا، ەگەر بۇل ۇيىمداستىرۋ پروتسەسى 2018 -جىلدىڭ قاڭتار ايىنا دەيىن سوزىلىپ كەتسە، ەمحانالار تاعى دا كەزەككە تولىپ، حالىقتىڭ نارازىلىعى تۋىنداۋى مۇمكىن.

 - زاڭ جوباسىندا ءبارى دۇرىس. تەك ونى ناقتى جۇزەگە اسىرۋ قاجەت. مەديتسينالىق ساقتاندىرۋ جۇيەسىن ەنگىزۋدە تىركەۋ كەزىندەگى تۇسىنىسپەۋشىلىكتەر قايتالانباسىن»، - دەپ اتاپ ءوتتى نىعماتۋلين.

اۆتور: ايجان سەرىكجان قىزى