تۇركىمەنستان پرەزيدەنتى قازاقستانعا مەملەكەتتىك ساپارمەن كەلەدى
«جاقىندا وزبەكستان پرەزيدەنتىنىڭ قازاقستانعا جاساعان ساپارى ءساتتى ءوتتى. جۋىردا مەملەكەت باسشىمىز نۇرسۇلتان نازاربايەۆ باكۋدە رەسمي ساپارمەن بولدى. جاقىندا بىزگە استاناعا تۇركىمەنستان پرەزيدەنتى مەملەكەتتىك ساپارمەن كەلەدى. وسىلايشا، ەلىمىزدىڭ ساياسي ءومىرى ۇلكەن وقيعالارعا تولى ەكەنىن انىق بايقاۋعا بولادى»، - دەدى مينيستر ءابدىراحمانوۆ شەت مەملەكەتتەردىڭ ەلشىلەرمەن كەزدەسۋى كەزىندە.
بەلگىلى بولعانداي، تۇركىمەنستان پرەزيدەنتى گۋربانگۋلى بەردىمۇحامەدوۆتىڭ ساپارى 12- ساۋىرگە جوسپارلانعان. سونداي-اق مينيستر استاناداعى ەكسپو-2017 حالىقارالىق كورمەسىندە بارلىق قاتىسۋشى مەملەكەتتەردىڭ جوعارى دەڭگەيدە ءوز جەتىستىكتەرىن تانىستىرا الاتىنىنا سەنىم ءبىلدىردى.
ايتا كەتەيىك، بۇگىنگى كەزدەسۋ قازاقستاننىڭ اۋىل شارۋاشىلىعى سالاسىن دامىتۋدىڭ مەملەكەتتىك باعدارلاماسىن شەت ەلدىڭ ديپلوماتتارىنا تانىستىرۋعا ارنالىپ وتىر.
ەسكە سالا كەتەيىك، تۇركىمەنستاندا بيىلعى جىلدىڭ 12- اقپانىندا وتكەن پرەزيدەنتتىك سايلاۋدا گۋربانگۋلى بەردىمۇحامەدوۆ ءۇشىنشى رەت رەسپۋبليكا باسشىسى بولىپ قايتا سايلانعان بولاتىن. وعان سايلاۋشىلاردىڭ %97,69 داۋىس بەرگەن ەدى.
