ءاسانالى ءاشىموۆ كوركەم فيلمدەردەگى جىنىستىق قاتىناس جايلى قويىلىمدارعا قارسى شىقتى
حالىق ءارتىسى ءتىپتى، ەر مەن ايەلدىڭ اراسىنداعى انايى بايلانىستى اشىق كورسەتكەن رەجيسسەرلەردى زاڭمەن جازالاۋدى ۇسىندى. ال، دەپۋتاتتار فونوگراممامەن ءان سالىپ، جۇرتتى الداپ جۇرگەن انشىلەردى دە جاۋاپقا تارتۋدى سۇراپ وتىر، دەپ حابارلايدى ك ت ك ارناسى. قازاق كينوسىنىڭ اقساقالى ءاسانالى ءاشىموۆ سوڭعى كەزدە وتباسىمەن بىرگە وتىرىپ وتاندىق كينونى كورۋدەن قالىپتى. ويتكەنى، توسەكتە الىسقان ەر مەن ايەلدىڭ جىنىستىق قاتىناسى اشىق ناسيحاتتالاتىن بولعان. ايگىلى اكتەر بۇل ارسىزدىقتى توقتاتۋ ءۇشىن سەناتورلاردان اراشا سۇراپ وتىر. سوندىقتان ءاشىموۆ سەكستى كورسەتۋگە زاڭمەن تىيىم سالۋ كەرەك دەيدى.
ءاسانالى ءاشىموۆ، ك س ر و حالىق ءارتىسى:
- "قىزدى اينالدىرۋ - ونەر، توسەككە جاتۋ - ءومىر!" رەجيسسەرلار سونىڭ ورتاسىن كورسەتەدى. اعايىندارىڭمەن كورىپ وتىرىپ ىڭعايسىز جاعدايعا قالاسىڭ. وسىنى زاڭمەن تىيساق جاقسى بولار ەدى. ال مادەنيەت ءمينيسترىن ەكرانداعى انايىلىقتان بۇرىن، «فەنيكس» پەن «قىزعىلت قويان» فيلمدەرىنە بولىنگەن قارجىنىڭ بوسقا ءراسۋا بولعانى قىنجىلتادى. ولاردىڭ ورنىنا تاريحي تۋىندىلار ءتۇسىرۋ كەرەك ەدى دەپ مۇحامەدي ۇلى وكىنىپ وتىر.
ارىستانبەك مۇحامەدي ۇلى، ق ر مادەنيەت جانە سپورت ءمينيسترى:
- ميفكە نەگىزدەلگەن قايداعى ءبىر «فەنيكس» دەگەن ءفيلمدى تۇسىردىك. قازىر ولار قايدا قالدى؟ بار اقشانى ۇرلاپ كەتتى. «روزوۆىي زايچيك» تە حالىقتىڭ قارجىسىنا تۇسىرىلگەن ەدى. داۋ تۋدىرعان «فەنيكستىڭ» رەجيسسەرى تۇڭعىشباي جامانقۇلوۆ بولاتىن. اكتەر قازىر وسى فيلمگە بولىنگەن ميلليونداردى جىمقىردى دەگەن كۇدىكپەن ءۇيقاماقتا وتىر. سونداي- اق، سەناتتا فونوگراممامەن ءان سالىپ، جۇرتتى الداپ اقشا تاۋىپ جۇرگەن انشىلەر جايلى دا ءسوز بولدى. دەپۋتاتتار مىڭداعان كورەرمەندى جيناپ الىپ، وتىرىك اۋزىن جىبىرلاتىپ كونسەرت وتكىزەتىن جۇلدىزداردى شەتىنەن جاۋاپقا تارتۋدى ۇسىندى.
سارسەنبەك ەڭسەگەنوۆ، سەنات دەپۋتاتى:
- كونسەرتكە كەلگەن ونەر يەسى ول قىزمەتىن ساتادى. كورەرمەن تۇتىنۋشى. اقشاسىن تولەپ كەلگەن تۇتىنۋشى. ەگەر وسى قارىم- قاتىناستا قارايتىن بولساق، تۇتىنۋشى ساپالى قىزمەت الۋى كەرەك. ارينە، انشىلەرىمىز ايتۋى مۇمكىن، كەيبىر كونسەرت قوياتىن جەرلەردىڭ ساپاسى كەلمەيدى، دىبىس قالپى بۇزىلادى دەپ. ءبىراق بۇرىندارى دا ءان ايتىپ ءجۇردى عوي. ال مادەنيەت ءمينيسترى فونوگراممامەن كۇرسۋ ءۇشىن الدىمەن، ءان كەشتەرىن ۇيىمداستىراتىن كومپانيالاردى ليسەنزيالاۋ قاجەت دەيدى. سوندا كورەرمەن ارتىستەردىڭ تەك جاندى داۋىسپەن ونەر كورسەتۋىن تالاپ ەتە الادى ەكەن. ءبىراق «مادەنيەت تۋرالى» زاڭ جوباسىندا فوننوگرامماعا تىيىم سالۋ تۋرالى ءبىر اۋىز ءسوز جوق. وسىعان قاراعاندا سەناتورلاردىڭ بۇل ۇسىنىسى جەردە قالاتىن سياقتى. ال قۇجات كۇشىنە ەنسە، جازۋشىلاردى جارىلقاپ، قالاماقىسىن كوبەيتكەلى تۇر. سونىمەن قاتار، جاڭا زاڭ بويىنشا، ەندى رەجيسسەرلەر ءوزى تۇسىرگەن ءار ءفيلمنىڭ مازمۇنىنا باسىمەن جاۋاپ بەرەدى. جانە ولاردان كينوعا كاسىبي اكتەرلەردى شاقىرۋ دا تالاپ ەتىلمەك.
