ەكسپوعا كەلەتىن مۇسىلماندار ءۇشىن ەڭ قولايلى جاعداي جاسالماق

استانا. قازاقپارات - استانادا وتەتىن ەكسپو حالىقارالىق كورمەسىنە كەلەتىن مۇسىلماندار ءۇشىن وتە ىڭعايلى جاعداي جاساۋ جوسپارلانىپ وتىر. بۇل تۋرالى «استانا كونۆەنشن بيۋرو» ج ش س- نىڭ ديرەكتورى سانيار ايتەكەنوۆ ءمالىم ەتتى، دەپ حابارلايدى قازاقپارات.

  «ءبىزدىڭ كومپانيا قازاقستان مۇسىلماندارى ءدىني باسقارماسىمەن بىرگە جاقىن ارادا «حالال- فرەندلي» باعدارلاماسىن ىسكە قوسادى. باعدارلاما تاياۋ شىعىستاعى مۇسىلمان ەلدەرىنەن كەلەتىن تۋريستەرگە باعىتتالعان. «حالال- فرەندلي» باعدارلاماسى قالامىزدا مۇسىلمان تۋريستەرگە جاعداي جاساۋعا باعىتتالعان. دالىرەك ايتساق، ەكسپو كورمەسىنە كەلەتىن تۋريستەرگە ارنالعان مەيرامحانالار مەن قوناق ۇيلەرگە «حالال» ستاندارتىن ەنگىزۋ باعدارلاماسى»، - دەيدى سانيار ايتەكەنوۆ.

 ول سونداي- اق الەم بويىنشا ساياحاتتايتىن مۇسىلمان تۋريستەردىڭ سانى جىل سايىن ارتىپ كەلە جاتقانىن اتاپ ءوتتى. 2014 -جىلى مۇسىلمان تۋريستەر الەمنىڭ تۋريزم سالاسىنا 145 ميلليارد دوللار پايدا تۇسىرگەن.

«ەگەر مۇسىلمانداردىڭ كوبى ەكونوميكاسى قارقىندى دامىپ جاتقان ەلدەردە ءومىر ءسۇرىپ جاتقانىن ەسكەرسەك، 2020 -جىلعا قاراي مۇسىلمان تۋريستەردىڭ سانى 150 ميلليون ادامعا جەتەدى دەپ بولجانىپ وتىر. مۇسىلمان تۋريستەر قوناق ۇيلەر مەن قىزمەت ساپاسىنا وتە بايىپپەن قارايدى. سوندىقتان، بيزنەسمەندەرمەن بۇل باعىتتا ءالى اڭگىمەلەسۋ كەرەك»، - دەيدى كومپانيا باسشىسى.

 اۆتور: كەنجەكەي توقتامۇرات قىزى