برازيليادا قاندى قول فۋتبولشىنىڭ الاڭعا ورالۋى داۋعا ۇلاستى - فوتو

استانا. قازاقپارات - برازيليا فۋتبول كلۋبىنىڭ باسى داۋعا قالدى. وعان ءىستى بولىپ، سوتتالعان سپورتشىمەن كەلىسىمشارت جاساۋى سەبەپ بولعان.

برۋنو فەرناندەسكە 2010 -جىلى بۇرىنعى سۇيىكتىسىنىڭ ولىمىنە قاتىستى قىلمىستى ۇيىمداستىردى دەگەن ايىپ تاعىلعان بولاتىن.

ال جاقىندا اباقتىدان شىققاننان كەيىن بىرنەشە اپتادان سوڭ ەكىنشى ديۆيزيونداعى فۋتبول كلۋبى «بوا ەسپورەمەن» قاقپاشى رەتىندە كەلىسىمشارت جاساسقان.

قاندى قول فۋتبولشىنىڭ الاڭعا ورالعانىنا دەمەۋشىلەر ورە تۇرەگەلىپ، جەلى قولدانۋشىلارى جاپپاي قارسىلىق ءبىلدىرىپ جاتىر.

ول 2013 -جىلى ەليزا سامۋديونىڭ ۇرلانۋىنا جانە ولىمىنە قاتىسى بار دەگەن ايىپپەن 22 -جىلعا سوتتالعان ەدى. ءبىراق سوت قايتا بەرگەن اپەللياتسياسىن دەر كەزىندە قاراماعاندىقتان بوستاندىققا شىققان. ونىڭ ادۆوكاتتارى زاڭعا سۇيەنە وتىرىپ، اپەللياتسيالىق شاعىمنىڭ ۋاقىتىندا قارالماۋىنا بايلانىستى تۇرمەدەن شىعارىپ العان.

ەليزانىڭ ءولىمى

ەليزا سامۋديونىڭ جوعالىپ كەتۋى، كەيىن قازا بولۋى برازيليالىق ب ا ق بەتتەرىندە كەڭىنەن جازىلعان ەدى.

2010 -جىلى برۋنو فەرناندەس ءبىرىنشى ديۆيزيونداعى «فلامەنگو» كلۋبىندا ءساتتى ونەر كورسەتىپ جۇرگەن. جانە 2014 -جىلى وتەتىن الەم چەمپيونىندا برازيليانىڭ نامىسىن قورعاۋعا مۇمكىندىگى دە بولعان.

فەرناندەس تۇتقىندالعاننان كەيىن ءوزىنىڭ بۇرىن كوڭىل جاراستىرعان قالىڭدىعى ەليزا سامۋديونىڭ ءولىمى تۋرالى بىلگەنىن مويىنداعان. ريو- دە- جانەيرونىڭ قوناق ۇيىنەن ۇرلاعان قىزدى قىلمىسكەرلەر تۇنشىقتىرىپ، ءمايىتىن يتتەرگە تاستاعان.

فەرناندەس ول كەزدە ءۇيلى- باراندى. پروكۋرورلار وعان سامۋديودان تۋعان بالاسىن مويىنداماۋ ءۇشىن ولتىرمەك بولدى دەگەن ايىپ تاقتى.

فەرناندەس ەليزانىڭ ءولىمى جايلى بىلگەنىن مويىنداعانىمەن، قىلمىستى ۇيىمداستىرماعانىن ايتىپ، اقتالادى. الايدا سوت ونى قىلمىستى ۇيىمداستىرۋ، ءمايىتتى جاسىرۋ فاكتىسىنە دە ايىپتى دەپ تانيدى. ول ءتىپتى ورتاق ۇلدارىن ۇرلاماق بولعان.

ەندى ونىڭ الاڭعا ورالۋى ۇلكەن داۋ تۋدىرىپ وتىر. ءۇش دەمەۋشى ەكىنشى ديۆيزيونداعى كلۋبقا قولداۋ كورسەتۋدەن باس تارتاتىندارىن دا مالىمدەپ ۇلگەردى.